Փետրվարի 16-ի առավոտյան 69 տարեկան հասակում մահացել է «Հայաստանի հելսինկյան կոմիտե» իրավապաշտպան հասարակական կազմակերպության նախագահ, իրավապաշտպան Ավետիք Իշխանյանը, հայտնել են նրա հարազատները, ովքեր իրավապաշտպանի Facebook-յան էջում հրապարակել են մահվանից առաջ գրված նրա հրաժեշտի խոսքը։
Իրավապաշտպանը հրաժեշտի խոսքում նշել է, որ 2020 թվականի պատերազմն ու նոյեմբերի 9-ի հայտարարությունը կործանեցին իր կյանքը։
«Դրանից հետո, այնուամենայնիվ, որոշակի հույսեր էի փայփայում, որ դավաճանին հեռացնելուց հետո, թերևս, հնարավոր է ինչ-ինչ հարցեր կարգի բերել, փոխել անդառնալի թվացող իրադարձությունների ընթացքը։ Սակայն, ավաղ, ոչ միայն չկարողացանք պարտության պատասխանատու և խորհրդանիշ ճիվաղին հեռացնել, այլև նա առավել ամրապնդեց իշխանությունը՝ շարունակելով հայրենիքի վաճառքը։ Այս տարիներին խոր հիասթափություն ունեցա շատ մտերիմներից՝ բարեկամներ, ընկերներ, գործընկերներ, ինչպես նաև հայ ժողովրդից և ողջ մարդկությունից․․․ ինքս ինձնից։ Այս ամենին ջղերս չդիմացան, և օր օրի առողջությունս քայքայվեց։ Այլևս չեմ տեսնում որևէ հույսի շող Հայաստանի և Արցախի ապագայի համար»,- գրել է իրավապաշտպանը։
Նա ընդգծել է, որ լինելով «Ղարաբաղ» կոմիտեի անդամ, որի նպատակն էր ազատագրել Արցախը, իր պատասխանատվությունն ու միաժամանակ անզորությունն է զգում Արցախի հարցում։
«Չեմ ցանկանում տեսնել հայրենիքիս վերջնական կործանումը, չեմ ցանկանում, որ իմ պահվածքի պատճառով հետապնդվեն իմ զավակները, նաև իմ տրամադրությամբ և առողջությամբ բեռ դառնալ հարազատներիս, ընկերներիս համար։ Կյանքն ինձ համար այլևս դարձել էր տառապանք և՛ ֆիզիկապես, և՛ հոգեպես։ Ամեն գիշեր պառկելուց մեծ հույսեր էի փայփայում, որ այլևս չեմ արթնանա։ Ներեցեք, եթե կարող եք, առաջին հերթին կինս՝ Նունեն, մայրս՝ Բյուրակն Չերազ-Անդրեասյանը, տղաներս՝ Ռաֆայելն ու Հրաչյան, քույրս՝ Վարդուհին, բոլոր հարազատներս, ընկերներս, համախոհներս»,- ասել է նա և հրաժեշտի խոսքը եզրափակել Վահան Տերյանի «Հրաժեշտի գազել» ստեղծագործությամբ։
Իշխանյանը բազմաթիվ գիտական աշխատանքների, հրապարակախոսական հոդվածների հեղինակ է։ 1996 թվականին համախոհների հետ հիմնադրել և մինչև օրս ղեկավարում էր «Հայաստանի հելսինկյան կոմիտե» իրավապաշտպան հասարակական կազմակերպությունը։ Հայրը լեզվաբան, գրականագետ Ռաֆայել Իշխանյանն է։
Ավելի ուշ հարազատները հայտնել են, որ տևական և անբուժելի հիվանդությունից տառապանքները չերկարաձգելու համար Իշխանյանը հրաժարվել է արհեստական սնուցումից։
