Սենատոր եղած տարիներին Ջո Բայդենը Հայաստանի լավագույն բարեկամներից էր, Ֆեյսբուքի իր էջում գրել է միջազգայնագետ, Ամերիկյան հետազոտությունների հայկական կենտրոնի տնօրեն Սուրեն Սարգսյանը։
Նրա խոսքով՝ Բայդենը ծանրակշիռ քաղաքական գործիչ է, ով լուրջ ճանապարհ է անցել, և եթե երիտասարդ տարիքում դառնար նախագահ՝ ԱՄՆ-ի պատմություն լավագույն և ամենասիրված նախագահներից մեկը կարող էր լինել:
«Կարծում եմ՝ 2016-ին Հիլարի Քլինթոնի թեկնածությունը դեմոկրատների ամենից սխալ հաշվարկված քայլերից էր և, եթե առաջադրվեր նույն Բայդենը, նա Թրամփին հաղթելու ավելի մեծ շանսեր կունենար: Թրամփը չհաղթեց, Հիլարին պարտվեց: Այդ դեպքում՝ Բայդենի թողած ժառանգությունն էապես այլ կլիներ, նրան այլկերպ կհիշեին»,- գրել է նա։
Ինչ վերաբերում է նոյեմբերին կայանալիք ընտրություններին, ապա, ըստ Սարգսյանի, Հարիսի թեկնածությունը լուրջ գլխացավանք է Թրամփի համար, քանի որ նրա շուրջ համախմբվելու է ամբողջ լիբերալ թևը և դա բավականին ուժեղ ալիք է ստեղծելու:
«Նրան աջակցելու են ՆԱՏՕ-ն և ԵՄ-ն: Իրականում՝ Թրամփը աշխարհի կեսի դեմ է կռիվ տալու, իսկ Քամալա Հարիսն իր 70-80 միլիոնանոց ձայները «քնած» ունի»,- գրել է նա:
Հուլիսի 21-ին Բայդենը հայտարարել էր մրցապայքարից դուրս գալու մասին։ Նա ասել էր, որ կենտրոնանալու է «միայն իր պաշտոնավարման մնացած ժամանակահատվածում նախագահի պարտականությունները կատարելու վրա»: Դեմոկրատական կուսակցության ներկայացուցիչները Բայդենին փոխարինող գտնելու անհրաժեշտության մասին սկսել էին խոսել ԱՄՆ նախագահի թեկնածու Դոնալդ Թրամփի հետ հեռուստաբանավեճում 81-ամյա նախագահի անհաջող ելույթից հետո։ Հուլիսի 17-ին Բայդենը չէր բացառել առողջական խնդիրների դեպքում նախագահական ընտրապայքարից դուրս գալու հնարավորությունը։
CBS-ն հուլիսի 22-ին գրել էր, որ ԱՄՆ փոխնախագահ Քամալա Հարիսը կարող է օգոստոսի 1-ին առաջադրվել Դեմոկրատական կուսակցության նախագահի թեկնածու։ ԱՄՆ-ում նախագահական ընտրությունները կանցկացվեն 2024 թվականի նոյեմբերի 5-ին։
