«Տավուշը հանուն հայրենիքի» շարժումն ավարտեց ակցիան Քննչական կոմիտեի դիմաց, ուր Սուրբ Խաչ եկեղեցուց երթով շարժվել էր հունիսի 3-ի առավոտյան։
«Քննչական կոմիտեից պահանջում ենք վարույթ սկսել բոլոր այն խուլիգանների նկատմամբ, որոնք 40 հոգով ծեծել են Աշոտ Սիմոնյանին, Աշոտ Հարությունյանին (Գյուղատնտեսության նախկին փոխնախարար-խմբ․), Արման Սարգսյանին, Կարեն Գևորգյանին, Արսեն Գրիգորյանին, Դանիել սարկագավին, Հրայր սարկավագին ու մյուսներին»,- հայտարարեց շարժման առաջնորդ Բագրատ արքեպիսկոպոս Գալստանյանը։
Նա հայտարարեց, որ այլևս անիմաստ է մնալ ՔԿ շենքի դիմաց։ Բագրատ Սրբազանը հայտնեց, որ երթով շարժվոմ են «իրենց ուղղությամբ»։ Այս պահին շարժումը երթով շրջում է Երևանի փողոցներով։
Ավելի ուշ շարժումը երթով հասավ Սուրբ Աննա եկեղեցու բակ։ Ժամը 19:00-ին Սուրբ Աննա եկեղեցու բակում տեղի կունենա օրվա ամփոփում։
Հունիսի 3-ին շարժումն ակցիա է իրականացրել Քննչական կոմիտեի դիմաց՝ հանդիպում պահանջելով ՔԿ նախագահ Արգիշտի Քյարամյանի կամ ՔԿ ներկայացուցչի հետ։ Շարժման աջակիցներն ի նշան բողոքի՝ ձեռնաշղթաներով ակցիա էին իրականացրել։ Նրանք այդ քայլով իրենց բողոքի ձայնն են բարձրացրել քաղաքացիներին բերման ենթարկելու, ձերբակալելու և բռնության ենթարկելու համար։ Մայիսի 31-ին շարժումն ԱԳՆ-ի դիմաց էր ակցիա իրականացրել՝ հանդիպում պահանջելով ԱԳ նախարար Արարատ Միրզոյանի հետ։ ԱԳՆ-ի դիմաց բախումներ էին սկսվել, իրավապաշտպան Ռուբեն Մելիքյանը հունիսի 2-ին հայտնել էր, որ ԱԳՆ շենքի մոտ տեղի ունեցած միջադեպից հետո ձերբակալվածների պահման վայրում 27 քաղաքացի կա։
Տավուշի սահմանամերձ գյուղերի բնակիչները բողոքի ակցիաներ էին սկսել ՀՀ ԱԳՆ-ի՝ ապրիլի 19-ին հայտարարությունից հետո, որով Հայաստանն ու Ադրբեջանը պայմանավորվել են սահմանազատման գործընթացն սկսել Տավուշից։ Բնակիչները հայտարարել էին, որ դեմ են Հայաստանի զիջումներին։ Մայիսի 4-ին «Տավուշը հանուն հայրենիքի» շարժումը երթ էր սկսել դեպի Երևան, ուր հասել էին մայիսի 9-ին և նույն օրն անցկացրել առաջին հանրահավաքը՝ հայտարարելով, որ պատրաստվում են ԱԺ-ում Փաշինյանի նկատմամբ անվստահության գործընթաց սկսել։
Երևանն ու Բաքուն մայիսի 15-ին ստորագրել էին Տավուշում սահմանի սահմանազատման արձանագրությունը։ Մայիսի 24-ին ՀՀ ԱԱԾ-ն հայտարարել էր, որ սահմանապահ զորքերը Տավուշում պաշտոնապես անցել են Ադրբեջանի հետ սահմանազատված սահմանի պահպանությանը, որը կիրականացվի Բերքաբեր բնակավայրի 1,9 կմ, Ոսկեպար և Բաղանիս բնակավայրերի 4,9 կմ հատվածներում։
Մայիսի 26-ին «Տավուշը հանուն հայրենիքի» շարժումը հանրահավաք էր իրականացրել, որի ընթացքում հայտարարել էին, որ վարչապետի իրենց թեկնածուն Բագրատ Սրբազանն է։ Շարժումը պահանջել էր վարչապետ Նիկոլ Փաշինյանի հրաժարականը՝ հայտարարելով մայիսի 27-ից անհնազանդության ակցիաներ սկսելու մասին։
