Մոսկվան չգիտի, թե որքանով է Երևանը պատրաստակամ Բաքվի հետ Մոսկվայում խաղաղության պայմանագիր ստորագրել, հայտարարել է ՌԴ արտգործնախարար Սերգեյ Լավրովը և ռուսական հարթակում համաձայնագիր ստորագրելու գործում Ադրբեջանի պատրաստակամությունը համարել «փաստ»։
«Փաստ է՝ մեր արևմտյան գործընկերները ցանկանում են, որ խաղաղության պայմանագիր կնքվի միայն իրենց տարածքում։ Փաստ է նաև այն, որ Ադրբեջանը պատրաստ է այն ստորագրել Ռուսաստանի տարածքում, որտեղ, ըստ էության, սկսվել են հակամարտությունը դադարեցնելու և բոլոր հարցերի լուծման համար փոխգործակցության մի ամբողջ համակարգ կառուցելու ջանքերը։ Ես չգիտեմ, թե Երևանը որքանով է պատրաստ դրան, թեև համապատասխան ազդակներ վաղուց են ուղարկվել Հայաստանի մայրաքաղաք»,- նշել է նա։
Մեկնաբանելով արևմտյան հարթակներում հայ-ադրբեջանական խաղաղության ստորագրման առավելությունները՝ Լավրովը հիշեցրել է, որ Ադրբեջանական ԽՍՀ ինքնավար մարզի սահմաններում Ղարաբաղը ճանաչող փաստաթուղթը հաստատվել է աշնանը Պրահայում՝ հենց Ֆրանսիայի նախագահ Էմանուել Մակրոնի միջնորդությամբ։
«2022թ. Լեռնային Ղարաբաղի կարգավիճակի հարցը փակել է անձամբ ՀՀ վարչապետ Նիկոլ Փաշինյանը»,- հայտարարել է Լավրովը՝ նշելով, որ 2020 թվականի նոյեմբերի 9-ի փաստաթղթերում Ղարաբաղի տարածքը նկարագրվել է որպես ռուս խաղաղապահների պատասխանատվության գոտի, և «երեք երկրների ղեկավարների միջև ըմբռնում է եղել, որ կարգավիճակի թեման դեռևս պետք է քննարկվի»։
ՌԴ ԱԳ նախարարը նաև ավելացրել է, որ Մոսկվան տեղյակ է ՀԱՊԿ-ից Հայաստանի հիասթափության մասին՝ Ադրբեջանին դատապարտելուց հրաժարվելու պատճառով։ «Բայց եթե հակամարտության պատմությամբ անցնեք մինչև դրա սկիզբը, ամեն քայլափոխի յուրաքանչյուր կողմ՝ Հայաստանն ու Ադրբեջանը, առաջընթացին ակնհայտորեն չնպաստած այնքան շատ գործողություններ կկուտակեն, որ մենք կարող ենք շատ հեռու գնալ… Կամ էլ մենք փնտրում ենք մեղավորներ, ու այսօր գոյություն ունեցող հնարավորություններից հրաժարվողներն իսկապես օգնություն են ստանում սահմանների ամրապնդման հարցում, կամ մենք աշխատում ենք մեր արևմտյան գործընկերների հետ, ինչպես արդեն հրապարակայնորեն հայտարարվել է Հայաստանում»,- ընդգծել է Լավրովը։
Ռուս դիվանագետի խոսքով՝ Մոսկվան երբեք Հայաստանի հետ հարաբերությունների լարվածության նախաձեռնություն չի արել։ «Հիշում ենք, երբ Հայաստանում գործող պաշտոնյաներից շատերը, դեռ ընդդիմադիր դաշտում, քարոզում էին ՀԱՊԿ-ից, ԵԱՏՄ-ից դուրս գալը, և երբ վարչապետ Փաշինյանը եկավ իշխանության, մենք նույնիսկ չնչին հորդոր, ինքներս մեզ Երևանից հեռացնելու ինչ-որ մղում չունեինք»,- նշել է Լավրովը։
Ռուս դիվանագետը վստահեցրել է, որ ամեն ինչ զարգացել է այնպես, ինչպես ՀՀ վարչապետ Նիկոլ Փաշինյանի նախորդների օրոք՝ «տնտեսության, էներգետիկայի, սոցիալական ոլորտում և ռազմաքաղաքական հարցերում»։
Հունվարի 10-ին Հայաստանի արտաքին գործերի նախարար Արարատ Միրզոյանը հայտարարել էր խաղաղության պայմանագրի վերաբերյալ Ադրբեջանի առաջարկների հետընթացի առկայության մասին։ Հունվարի 12-ին ՌԴ ԱԳՆ ներկայացուցիչ Մարիա Զախարովան խոստովանել էր, որ խաղաղության պայմանագրի հարցում Ադրբեջանի դիրքորոշման հետընթացը կապված է Կովկասում բանակցությունների գծով ԱՄՆ պետքարտուղարի ավագ խորհրդական Լուի Բոնոյի Երևան այցի հետ։
