Զինծառայությունից կամ զորահավաքից խուսափելու գործերով փորձաքննությունից հրաժարվելու համար կարող է սահմանվել մինչև 2 տարվա ազատազրկում, նախագիծն ընդունել է ՀՀ կառավարությունը՝ հունիսի 25-ի նիստում։
Նախագիծը վերաբերում է ոչ թե բոլոր զորակոչիկներին, այլ պարտադիր զինվորական, այլընտրանքային ծառայության զորակոչներից կամ վարժական հավաքից խուսափելու հատկանիշներով հարուցված քրեական վարույթներով անցնողներին։
Եթե այդ վարույթի շրջանակում քաղաքացուն նշանակվի առողջական վիճակի հետազոտություն կամ փորձաքննություն, իսկ նա հրաժարվի կամ խուսափի դրանից, դա կարող է դառնալ առանձին քրեական պատասխանատվության հիմք՝ կկիրառվի 1-2 տարի ազատազրկում։
Քաղաքացին կարող է ազատվել քրեական պատասխանատվությունից, եթե մինչդատական կամ դատական վարույթի ընթացքում կամավոր անցնի նշանակված հետազոտությունը, փորձաքննությունը կամ տրամադրի հետազոտման համար անհրաժեշտ նմուշ։
Գործող Քրեական օրենսգիրքն արդեն պատասխանատվություն է սահմանում պարտադիր զինվորական կամ այլընտրանքային ծառայությունից, ինչպես նաև զորահավաքային զորակոչից կամ վարժական հավաքից խուսափելու համար։
2025-ին օրենսդրությունը խստացվել էր, որով վարժական հավաքներից խուսափելը պատժվում է ոչ թե առավելագույնը 2, այլ մինչև 3 տարի ժամկետով, իսկ տուգանքը կարող է տատանվել նվազագույն աշխատավարձի (75 000 դրամ) տասնհինգապատիկից մինչև երեսնապատիկի չափով։
