ՀՀ հակակոռուպցիոն կոմիտեն հայտնել է «Բարգավաճ Հայաստան» կուսակցության (ԲՀԿ) օգտին ընտրողներին ենթադրյալ կաշառելու վերաբերյալ քրեական վարույթով նոր ձերբակալությունների մասին։
Ըստ քննության վարկածի՝ ԲՀԿ ներկայացուցիչը խորհրդարանական ընտրություններից առաջ ընտրողներին ընտրակաշառք է տվել և այլ ծառայություններ մատուցել՝ կուսակցության օգտին քվեարկելու պայմանով։
Կոմիտեից հայտնում են, որ քրեական վարույթի շրջանակում իրականացվել են խուզարկություններ և վարութային այլ գործողություններ, ձերբակալվել են մի շարք անձինք։
Գերատեսչությունը հրապարակել է նաև ձայնագրության հատված, որում զրուցակիցները քննարկում են ընտրողների վերաբերյալ տվյալների հավաքագրման, կուսակցության աջակիցների թվի հաշվառման, ինչպես նաև անձնական հարցերի կարգավորմանն ուղղված տարբեր աջակցությունների տրամադրման հարցեր։ Խոսակցության ընթացքում հիշատակվում է նաև ԱԺ «Պատիվ ունեմ» խմբակցության պատգամավոր, «Բարգավաճ Հայաստան» կուսակցության պատգամավորի թեկնածու Մարտուն Գրիգորյանի անունը։
Ավելի վաղ Հակակոռուպցիոն կոմիտեն հայտնել էր ԲՀԿ-ի օգտին ընտրողներին ենթադրյալ կաշառելու վերաբերյալ մի քանի քրեական վարույթի մասին Վանաձորում, Աբովյանում, Վայոց ձորի և Լոռու մարզերում, որոնց շրջանակում ևս իրականացվել էին խուզարկություններ ու ձերբակալություններ, իսկ ներգրավված անձանց մի մասը կալանավորվել էր։
