Մեծ Բրիտանիան 1 միլիոն ֆունտ սթերլինգ կտրամադրի Կարմիր խաչի միջազգային կոմիտեին՝ Լեռնային Ղարաբաղում հումանիտար իրավիճակին աջակցելու համար, հայտնում է բրիտանական կառավարությունը։
«Մեծ Բրիտանիան հայտարարել է ԿԽՄԿ-ին կենսականորեն անհրաժեշտ ֆինանսավորման մասին՝ Լեռնային Ղարաբաղի և ողջ տարածաշրջանի խոցելի մարդկանց տրամադրելու հիմնական դեղամիջոցներ, բժշկական օգնություն և այլ աջակցություն», – ասվում է կառավարության հայտարարության մեջ:
Նշվում է, որ ֆինանսավորում է տրամադրվում վիրավորներին տեղափոխելու և տեղահանված ընտանիքների հետ կապի պահպանման համար։ Մեծ Բրիտանիայի եվրոպական հարցերով քարտուղար Լեո Դոերտիի խոսքով՝ ֆինանսական փաթեթը կօգնի պաշտպանել տեղահանված ընտանիքներին և կենսական օգնություն կտրամադրի առավել խոցելի խավերին:
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»: Վերջին տվյալներով՝ Արցախի դեմ ադրբեջանական ագրեսիայի հետևանքով կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին, որի պայմաններն էին՝ հայկական զինված կազմավորումները վայր են դնում զենքերը, լքում մարտական դիրքերն ու ամբողջությամբ զինաթափվում, հանձնվում է ողջ սպառազինությունն ու ծանր տեխնիկան։
Պայմանավորվածության համաձայն՝ սեպտեմբերի 21-ին Եվլախում տեղի էր ունեցել Արցախի և Ադրբեջանի ներկայացուցիչների հանդիպումը։ Ստեփանակերտը հայտնել էր, որ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։
Սեպտեմբերի 28-ին Արցախի նախագահ Սամվել Շահրամանյանը ԱՀ պետական համակարգը լուծարելու հրամանագիր է ստորագրել, որով Արցախի Հանրապետությունը դադարում է գոյություն ունենալ։
