Դիվանագիտական հարաբերությունների հաստատման 30-ամյակը և Բարեկամության, համագործակցության և փոխադարձ օգնության պայմանագրի 25-ամյակը մեր դաշնակցային և ռազմավարական գործընկերության ուղենշային տարեթվերն են: Այս մասին ուրբաթ օրը ՀՀ ԱԳ նախարար Արարատ Միրզոյանի հետ համատեղ մամուլի ասուլիսի ժամանակ հայտարարել է Ռուսաստանի Դաշնության արտաքին գործերի նախարար Սերգեյ Լավրովը։
Նրա խոսքով՝ այդ ամսաթվերին նվիրված բազմաթիվ միջոցառումներ հետևողականորեն իրականացվում են։
Լավրովն ընդգծել է, որ Ռուսաստանը շարունակում է մնալ Հայաստանի առևտրային և ներդրումային առաջատար գործընկերը և հավելել է, որ Ռուսաստանի մասնաբաժինը Հայաստանի արտաքին առևտրում գերազանցում է 30 %-ը: «Մենք գոհունակությամբ նշել ենք, որ կորոնավիրուսային վարակով պայմանավորված անկումից հետո մեզ հաջողվել է ապրանքաշրջանառությունը վերադարձնել կայուն աճի տիրույթ։ Անցյալ տարի այն կազմել է ավելի քան 2,6 մլրդ դոլար»,- հայտնել է ռուս նախարարը։
Համագործակցության առանցքային ուղղություններից Լավրովը մատնանշել է էներգետիկան՝ ներառյալ ատոմային էներգետիկան, հանքարդյունաբերությունը, տրանսպորտը, լոգիստիկան և նշել, որ ներկայումս շուրջ 20 ռուսական տարածաշրջաններ Հայաստանի մարզերի հետ համագործակցության համաձայնագրեր ունեն:
Լավրովի տեղեկություններով՝ մշակույթի, կրթության, տեղեկատվության, զբոսաշրջության, սպորտի ոլորտներում համագործակցության խորացման շրջանակներում Երևանում կտեղադրվի հայ-ռուսական բարեկամության «Դարերի միասնություն» հուշարձանը, Ռուսաստանում կանցկացվեն Հայաստանի մշակույթի օրեր, իսկ Հայաստանում՝ Ռուսաստանի հոգևոր մշակույթի օրեր: Բացի այդ, Ռուսաստանի ԱԳՆ ղեկավարը հայտնել է, որ Հայաստանում կավելանա ռուսական դպրոցների թիվը, պայմանավորվածություն է ձեռք բերվել նաև ուսանողական և ակադեմիական փոխանակումների ավելացման մասին:
Խոսելով Հարավային Կովկասում տիրող իրավիճակի մասին՝ Սերգեյ Լավրովը հայտարարել է Ռուսաստանի, Հայաստանի և Ադրբեջանի ղեկավարների եռակողմ պայմանավորվածությունների անշեղ կատարման կարևորության մասին:
«Մենք անդրադարձել ենք այն հարցերին, որոնք քննարկվել են մեր առաջնորդների մակարդակով՝ ներառյալ հայ-ադրբեջանական սահմանի սահմանագծման և սահմանազատման հանձնաժողովի ստեղծումը և սահմանային կայունության և վստահության ամրապնդման հետագա քայլերը։ Հուսով ենք, որ ամենամոտ ապագայում նման հանձնաժողով կստեղծվի: Համենայնդեպս, մենք այդ ճանապարհին որևէ խոչընդոտ չենք տեսնում»,- հայտարարել է ռուս նախարարը։
Նա կարևորել է հումանիտար խնդիրների լուծման ուղղությամբ ջանքերի շարունակումը, Ռուսաստանի, Հայաստանի և Ադրբեջանի փոխվարչապետների համանախագահությամբ եռակողմ աշխատանքային խմբի գործունեության վերսկսումը, որը կոնկրետ ուղղությամբ քննարկում է տարածաշրջանում տրանսպորտային և տնտեսական կապերի վերականգնման հետ կապված հարցեր:
ՌԴ ԱԳՆ ղեկավարը նաև տեղեկացրել է, որ այսօր երկու երկրների արտաքին քաղաքական գերատեսչությունների ղեկավարները ստորագրել են ՀՀ արտաքին գործերի նախարարության և ՌԴ արտաքին գործերի նախարարության միջև 2022-2023 թթ. խորհրդատվությունների ծրագիրը:
ՀՀ ԱԳ նախարար Արարատ Միրզոյանն իր խոսքում անդրադարձել է Լեռնային Ղարաբաղում Ադրբեջանի գործողություններին, որոնք «ուղղված են հումանիտար ճգնաժամին»:
Նա հիշատակել է Ադրբեջանի զինված ուժերի վերահսկողության տակ գտնվող հատվածում գազատարի «վթարի» մասին, որի հետևանքով Ղարաբաղը երկար ժամանակ զրկված է եղել գազամատակարարումից, անդրադարձել է հրադադարի ռեժիմի մշտական խախտումներին, մարտի 24-ին Ադրբեջանի զինված ուժերի կողմից Փառուխ գյուղի հատվածում՝ ռուսական խաղաղապահ զորախմբի պատասխանատվության գոտում ներխուժմանը, Ադրբեջանի ղեկավարության ագրեսիվ հռետորաբանությանը:
Միրզոյանն ասել է, որ այդ հարցերն առաջնահերթ էին Ռուսաստանի ԱԳ նախարարի հետ բանակցություններում։ «Կցանկանայի կրկին ընդգծել, որ Ռուսաստանը առանցքային դեր է խաղացել Լեռնային Ղարաբաղի դեմ ադրբեջանական ագրեսիայի կասեցման գործում։ Մենք բարձր ենք գնահատում Ռուսաստանի միջնորդական ջանքերը ԵԱՀԿ Մինսկի խմբի համանախագահների շրջանակներում»,- հայտարարել է Միրզոյանը՝ հավելելով, որ այսօր առաջնային հարցը հայ ռազմագերիների վերադարձն է, հայ ժողովրդի պատմամշակութային ժառանգության պահպանումն է այն տարածքներում, որոնք անցել են Ադրբեջանի վերահսկողության տակ։
Հայաստանի արտգործնախարարը վստահություն է հայտնել, որ Հարավային Կովկասի տարածաշրջանում խաղաղությունն ու կայունությունը կարելի է հասնել բացառապես բանակցությունների միջոցով։
