Բյուրեղավան համայնքում մեկ գիշերվա ընթացքում աղիքային վարակի ախտանշաններով բժշկական օգնության դիմելու 15 դեպք է արձանագրվել, 6 մարդ հոսպիտալացվել է, հայտնել են առողջապահության նախարարությունից։
Հիվանդների մոտ նկատվում են ինքնազգացողության վատացում, բարձր ջերմություն և ցավեր որովայնի շրջանում։ Գերատեսչությունը հոսպիտալացվածների վիճակը գնահատել է միջին ծանրության։
ԱՆ-ից հավելել են, որ մասնագետներն իրականացնում են համաճարակաբանական հետազոտություն՝ վարակի աղբյուրն ու փոխանցման ուղիները պարզելու համար։
«Վեոլիա ջուր» ընկերությունը, անդրադառնալով դեպքին, հայտարարել է, որ ջրի նմուշներում շեղումներ չի հայտնաբերել։
««Վեոլիա Ջուր» ընկերությունը սահմանված կարգով և պարբերաբար իրականացնում է խմելու ջրի նմուշառումներ ջրաղբյուրներում և օրվա կարգավորիչ ջրամբարներում»,- նշել են ընկերությունից։
Սա առաջին նմանատիպ դեպքը չէ Բյուրեղավանում։ Ապրիլին աղիքային վարակի բռնկումից հետո բժշկական օգնության էր դիմել մոտ 30 մարդ, որոնցից 11-ը հոսպիտալացվել էին։ Հիվանդությունների վերահսկման և կանխարգելման ազգային կենտրոնն այն ժամանակ խմելու ջրում հայտնաբերել էր կոլիֆորմ բակտերիաներ, իսկ բուժառուների կենսանմուշներում՝ ռոտավիրուս, ադենովիրուս և աղիքային ցուպիկի պաթոգեն խմբերի հարուցիչներ։
Ջրից հնարավոր թունավորման դեպքի առնչությամբ Քննչական կոմիտեն քրեական գործ էր հարուցել, սակայն ջրամատակարարման օպերատոր «Վեոլիա ջուր» ընկերությունը հայտարարել էր, որ ջրի նմուշներում շեղումներ չի հայտնաբերել։ Ավելի ուշ կատարված կրկնակի հետազոտությունները ցույց էին տվել, որ խմելու ջրի որակը համապատասխանում է սանիտարական նորմերին։
