Հայաստանը Եվրամիությունից ստացել է օգնության խմբաքանակ, որի մեջ ներառվել է մոտ 20 տոննա կշռող հեռակառավարվող մեքենա՝ մարդասիրական ականազերծման համար, հայտնել է ՀՀ կառավարությունը։
Հայաստանի Հանրապետությունում Եվրոպական միության դեսպան Վասիլիս Մարագոսը, ներկայացնելով ականազերծման մեքենան, հակտարարել է, որ ԵՄ-ն նախատեսում է Հայաստանում կառուցել 3 սահմանային անցակետ, հայտնել է «Արմենպրեսը»։
Մարագոսը նշել է, որ մեքենան անցակետերի կառուցման շրջանակում կարևոր նշանակություն կունենա երկու ուղղությամբ։
«Կապի նախագծերը պահանջում են մաքրել այն տարածքները, որոնցով դրանք պետք է անցնեն։ Ականազերծումը կլինի առաջին անհրաժեշտ քայլը, որպեսզի այդ կարևոր շինարարական աշխատանքները կարողանան առաջ շարժվել»,- նշել է Մարագոսը՝ չմանրամասնելով, թե որ հատվածներում է նախատեսվում սահմանային անցակետերի կառուցումը։
Կառավարությունում հավելել են, որ տեխնիկան կօգտագործվի վտանգավոր տարածքների ականազերծման, ինչպես նաև Հայաստանի և Ադրբեջանի միջև պետական սահմանի սահմանազատման աշխատանքների ընթացքում։
Գործադիրի տվյալներով՝ Հայաստանում պայթյունավտանգ առարկաներով աղտոտված է համարվում շուրջ 43 մլն քառակուսի մետր տարածք՝ Տավուշի, Սյունիքի, Վայոց Ձորի, Արարատի և Գեղարքունիքի մարզերում։ Այս հողերի մեծ մասը գյուղատնտեսական նշանակության հողեր են, արոտավայրեր և ենթակառուցվածքային օբյեկտներով տեղամասեր։
«Հումանիտար ականազերծման և փորձագիտական կենտրոնի» տնօրեն Էդուարդ Պետրոսյանը նշել է, որ այս տարածքների մաքրումը թույլ տալու վերադարձնել դրանք տնտեսական շրջանառություն և վերականգնել ենթակառուցվածքները։
Գործադիրում հավելել են, որ բացի հեռակառավարվող երկու մեքենայից, Հայաստանը կստանա նաև շտապօգնության երկու լիարժեք կահավորված ավտոմեքենա։
Մատակարարված մեքենաներն արտադրված են խորվաթական ընկերության կողմից և նախատեսված են հատուկ մարդասիրական ականազերծման համար։
Արտադրողի ներկայացուցիչ Կոնստանտին Դարմանյանի խոսքով՝ այսպիսի տեխնիկան արդեն կիրառվում է Բալկանյան երկրներում, Սաուդյան Արաբիայում, Եմենում և Ուկրաինայում։ Ընդհանուր առմամբ, ընկերությունը մատակարարել է ավելի քան 500 միավոր սարքավորում 41 երկրում։
Կարդացեք նաև՝
ԵՄ-ն Հայաստանին 34 մլն եվրո է հատկացրել ՌԴ սահմանափակումները մեղմելու համար
