«Ուժեղ Հայաստանը» վերաքվեարկություն է պահանջում այն տեղամասերում, որտեղ արդյունքները չեղարկվել են, հայտարարել է «Ուժեղ Հայաստան» կուսակցության խորհրդի անդամ Նարեկ Կարապետյանը։
Կարապետյանն ընդգծել է, որ երկու ընտրատեղամասում քվեարկության արդյունքներն անվավեր ճանաչելու Կենտրոնական ընտրական հանձնաժողովի որոշումը նպատակ ունի թույլ չտալ «Բարգավաճ Հայաստան» կուսակցության մուտքը խորհրդարան։
Նրա խոսքով՝ այն բանից հետո, երբ իրենց քաղաքական ուժը հայտարարեց, որ «Քաղաքացիական պայմանագիր» կուսակցությունը կորցրել է Սահմանադրությունը փոփոխելու համար անհրաժեշտ պատգամավորական ձայների 3/5 մեծամասնությունը, ԿԸՀ-ն չեղարկեց արդյունքներն այն երկու տեղամասերում, որտեղ «Բարգավաճ Հայաստանը» բարձր աջակցություն էր ստացել։
Կարապետյանը նշել է, որ զինծառայողների քվեարկության հետ կապված խախտումներ արձանագրվել են ոչ միայն այդ, այլև բազմաթիվ այլ ընտրատեղամասերում։
«Մենք՝ որպես Հայաստանի ամենամեծ ուժը, որը հնարավորություն ունի փոխարինելու ՔՊ-ին, հայտարարում ենք, որ եթե ԿԸՀ-ն և իշխանությունները կրկնաընտրություն չնշանակեցին այս տեղամասերում, դա հատելու է ժողովրդավարության բոլոր կարմիր գծերը»,- հայտարարել է Կարապետյանը։
Հունիսի 7-ին ՀՀ-ում անցկացվել էին Ազգային ժողովի ընտրություններ, որին մասնակցել էր 18 քաղաքական ուժ՝ 16 կուսակցություն և 2 դաշինք։ ԿԸՀ նախնական տվյալներով՝ 2 503 976 ընտրողից մասնակցել էր 1 477 736-ը (58,94%)։ Նախնական տվյալներով՝ անցողիկ շեմը հաղթահարել էր քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։
«Բարգավաճ Հայաստան» կուսակցությունը, որը նախնական արդյունքով չի հաղթահարել անցողիկ 4%-ի շեմը, վերահաշվարկ էր պահանջել։ Հունիսի 9-ին շուրջ 50 ընտրատեղամասում վերահաշվարկի դիմում էր ներկայացրել նաև «Ուժեղ Հայաստանը»։ «Հայաստան» դաշինքը վերջնական արդյունքների հրապարակումից հետո կդիմի Սահմանադրական դատարան։ Ավելի ուշ՝ հունիսի 11-ին, «Ուժեղ Հայաստանը» հայտարարել էր, որ դաշինքը կպահանջի չեղարկել ընտրությունների արդյունքները և վերանայել ՔՊ-ի ձայները։
Ընտրությունների վերջնական արդյունքը կհրապարակվի հունիսի 14-ին՝ ինքնաշխատ եղանակով վերահաշվարկներից հետո։
Կարդացեք նաև՝
Ի՞նչ խախտումներ են արձանագրվել ընտրատեղամասերում
