Հայաստանի իշխանությունները «զանգվածային հանցագործություններ» են կատարում՝ ՀՀ ժամանող քաղաքացիներին 25-օրյա վարժական հավաքների ծանուցագրեր բաժանելով և, որպես արդյունք, սահմանափակելով նրանց ելքը երկրից, հայտարարել է ընդդիմադիր «Հայաստան» խմբակցության պատգամավոր Գեղամ Մանուկյանը։
Նա նշել է, որ ռազմական ոստիկանության պահանջով վերջերս Հայաստան ժամանած բազմաթիվ քաղաքացիների ելքը երկրից արգելվել է։
Պատգամավորը մանրամասնել է, որ նման միջոցառում կարող է կիրառվել միայն այն քաղաքացիների նկատմամբ, ովքեր հանցագործություն են կատարել, հետախուզվում են կամ ովքեր այս կամ այն պատճառով ունեն երկրից բացակայելու սահմանափակում։
Նա նաև բացատրել է, որ վարժական հավաքներին չներկայանալու համար քրեական գործ կարող է հարուցվել միայն այն դեպքում, երբ պարզ դառնա, որ քաղաքացին հրաժարվում է ստանալ ծանուցումը և մասնակցել հավաքներին, որոնք պահանջում են 15-20 օր, սակայն մի քանի օր առաջ երկիր ժամանած անձանց արգելվում է դուրս գալ Հայաստանից։
Որպես իշխանությունների գործողությունների օրինակ՝ Մանուկյանը հայտնել է, որ ՀՀ վարչապետ Նիկոլ Փաշնյանի դեմ սոցիալական ցանցերում գրառումից հետո այս տարի բանակից զորացրված քաղաքացին կանչվել է վարժական հավաքի։ Նրան մեկ տարի իրավունք չունեն կանչել 25 օրյա վարժական հավաքի։ Պատգամավորի խոսքով՝ Կապանում 53-ամյա մի տղամարդ, որն ամեն տարի իր ծննդյան օրը վերադառնում է հայրենիք, ստացել է ծանուցագիր։
Հայաստան ժամանելու հաջորդ օրը քահանային նույնպես հանձնվել էր ծանուցագիր։ Մանուկյանը նաև հիշեցրել է լրագրող Նարեկ Խաչատրյանի դեպքը, որն ընտրախախտումներ էր արձանագրել։
Հունիսի 4-ին «Փաստ» թերթը գրել էր, որ Ռուսաստանից Հայաստան վերադարձող մինչև 55 տարեկան ՀՀ քաղաքացիներին միանգամից տանում են 25-օրյա վարժական հավաքների։ ՊՆ-ից մեկնաբանել էին, որ ռազմական ոստիկանությունը սահմանակետերում իրականացնում է ծառայություն՝ նպատակ ունենալով աջակցել զինվորական կոմիսարիատներին՝ զինապարտ քաղաքացիներին զինվորական հաշվառման վերցնելու, պարտադիր զինվորական ծառայության զորակոչելու և պահեստազորային պատրաստության միջոցառումներին ներգրավելու գործընթացում:
