Հայաստանը, փաստացի, չունի ռուսական գազին այլընտրանք, «Վեստի» լրատվականին տված հարցազրույցում հայտարարել է ՌԴ փոխվարչապետ Ալեքսեյ Օվերչուկը։
Նա մեկնաբանել է Երևանի կողմից Եվրամիության հետ մերձեցման և եվրոպական շուկային ինտեգրվելու փորձերը՝ նշելով, որ Հայաստանում կարող է բարդ իրավիճակ ստեղծվել գազի մատակարարումների հետ կապված, սակայն Ռուսաստանը շահագրգռված չէ իրադարձությունների նման զարգացմամբ։
«Նրանք ընդամենը պետք է նայեն քարտեզին, տեսնեն, թե ի՞նչ խողովակաշարեր են գործում հիմա։ Անմիջապես կտեսնեն, թե ումից են ստանալու ռուսական գազը՝ հաշվի առնելով 30% արտահանման մաքսատուրքը, հաշվի առնելով, որ դա լինելու է շուկայական գին և հաշվի առնելով, որ միջնորդներն էլ կցանկանան ստանալ եկամտի իրենց բաժինը»,- նշել է փոխվարչապետը։
Նա ընդգծել է, որ ԵՄ-ին ինտեգրվելու դեպքում, երբ Հայաստանը կորցնի ԵԱՏՄ շրջանակներում գործող արտոնությունները, կապույտ վառելիքը երկրի համար կարող է զգալիորեն թանկանալ մաքսատուրքերի, շուկայական գնագոյացման և միջնորդների ներգրավվածության պատճառով։
«Ուստի Հայաստանում իրավիճակը կլինի շատ բարդ։ Մենք դա չենք ուզում»,- հայտարարել է Օվերչուկը։
Նրա հայտարարությունը հնչում է վերջին շաբաթներին Մոսկվայի և Երևանի միջև գազի գնի շուրջ հեռակա քննարկումների ֆոնին։
ՌԴ ԱԳՆ պաշտոնական ներկայացուցիչ Մարիա Զախարովան մայիսի 28-ին հայտնել էր, որ Մոսկվան գրավոր զգուշացրել է Երևանին՝ Հայաստանի՝ ԵՄ-ին անդամակցելու դեպքում գազի, նավթամթերքի և ալմաստի վերաբերյալ համաձայնագրերի խզման ռիսկերի մասին։
ՀՀ տարածքային կառավարման և ենթակառուցվածքների նախարար Դավիթ Խուդաթյանը հայտարարել էր, որ Երևանն ի գիտություն է ընդունել Մոսկվայի նամակը՝ գազի մատակարարման պայմանավորվածությունների հնարավոր վերանայման վերաբերյալ։ Նրա խոսքով՝ Հայաստանը մշտական կապի մեջ է ռուս գործընկերների հետ, իսկ աշխատանքային հարաբերությունները մնում են բնականոն հունի մեջ։
Ռուսական գազի, նավթամթերքի և չմշակված ալմաստի անմաքս մատակարարման մասին համաձայնագիրն ստորագրվել էր 2013 թվականին և վավերացվել 2014-ին։ Այն տարածվում է միայն ներքին սպառման ծավալների վրա և արգելում վերաարտահանումը։
