ԿԸՀ-ն անձեռնմխելիությունից զրկել է Անդրանիկ Թևանյանին

«Մայր Հայաստան» կուսակցության նախագահ, «Բարգավաճ Հայաստան» նախընտրական ցուցակի 2-րդ համար Անդրանիկ Թևանյանին կզրկեն ազատությունից, հայտնել են «Մայր Հայաստան» կուսակցությունից և հավելել, որ Թևանյանը փաստաբանների հետ գնում է Քննչական կոմիտե։

Armenia Today-ին ՀՀ գլխավոր դատախազությունից հայտնել են, որ Կենտրոնական ընտրական հանձնաժողովը բավարարել է դատախազության երկու միջնորդությունները՝ Թևանյանի նկատմամբ քրեական հետապնդում հարուցելու և ազատությունից զրկելու վերաբերյալ։

Այսօր ավելի վաղ իրավապահ համակարգի աշխատակիցները քննչական գործողություններ էին իրականացրել Թևանյանի բնակարանում և գրասենյակում։

Թևանյանի նկատմամբ գործողություններն սկսվել էին ՀՀ վարչապետ Նիկոլ Փաշինյանի՝ նրա դեմ պետական դավաճանության հոդվածով քրեական գործ հարուցելու մասին հայտարարությունից մեկ օր անց։

Քննչական կոմիտեն մայիսի 21-ին հայտնել էր Թևանյանի նկատմամբ պետական դավաճանության և լրտեսության փաստով քրվարույթ նախաձեռնելու մասին՝ պատգամավոր լինելու ժամանակ խորհրդարանի՝ 2024-ի փակ նիստի տվյալների հնարավոր հրապարակման պատճառով։

Թևանյանն անհեթեթ էր անվանել իրեն առաջադրված մեղադրանքները՝ նշելով, որ 2023-ին մանդատը վայր էր դրել, և 2024-ին ֆիզիկապես չէր կարող ԱԺ-ում լինել։