Նախընտրական քարոզչությանը խոչընդոտելու գործով ձերբակալված Արմեն Հովհաննիսյանին մայիսի 16-ին «Նուբարաշեն» հոգեկան առողջության պահպանման կենտրոնում կախված վիճակում են հայտնաբերել։
Մահվան մասին տեղեկությունն Armenia Today-ին հաստատել են ՀՀ Ներքին գործերի նախարարությունից։ Ըստ ՆԳՆ-ի ստացած հաղորդման՝ նա ինքնասպանություն է գործել։
Factor TV-ի տվյալներով՝ Հովհաննիսյանը ձերբակալվել էր նախընտրական պաստառ պատռելուց հետո։
ՆԳՆ տվյալներով՝ Հովհաննիսյանը ձերբակալվելուց հետո տեղափոխվել էր ոստիկանության Արտաշատի բաժին, իսկ հոգեկան առողջության հետ կապված խնդիրների ի հայտ գալուց հետո շտապօգնության մեքենայով տեղափոխվել «Նուբարաշեն» կենտրոն։
«Մայիսի 16-ին՝ ժամը 09:30-ի սահմաններում, ձերբակալվածի մոտ նկատվել է հոգեկան անհավասարակշիռ վարքագիծ, ինչից հետո հրավիրվել է շտապօգնություն: Շտապօգնության բժշկի ցուցումով ձերբակալվածը ոստիկանների ուղեկցությամբ՝ շտապօգնության մեքենայով, տեղափոխվել է հոգեկան առողջության կենտրոն»,- հավելել են ՆԳՆ-ից։
Ավելի ուշ՝ ժամը 18:07-ին, ՆԳՆ-ն հաղորդում է ստացել նրա մահվան մասին։
Armenia Today-ը ՔԿ-ից տեղեկացել է, որ տղամարդն անցնում էր նախընտրական քարոզչությանը խոչընդոտելու հատկանիշներով նախաձեռնված գործով։ ՀՀ քրեական օրենսգրքի 211-րդ հոդվածի 1-ին մասով նախաձեռնված վարույթի շրջանակներում նրան սպառնում էր մինչև երեք տարվա ազատազրկում։ ՔԿ-ից հավելել են, որ նա մեղադրյալի կարգավիճակ չուներ։
Ավելի ուշ Մարդու իրավունքների պաշտպան Անահիտ Մանասյանը հայտնել է, որ իրավասու մարմիններից պարզաբանումներ կպահանջի դեպքի բոլոր հանգամանքների վերաբերյալ։ Պաշտպանը նշել է, որ ազատությունից զրկված և հոգեկան առողջության հաստատությունում գտնվող անձինք պետության հատուկ պաշտպանության ներքո են, ուստի դեպքը պետք է դառնա անհապաղ և բազմակողմանի քննության առարկա։
Armenia Today-ն ավելի ուշ ՔԿ-ից տեղեկացել է, որ դեպքի առնչությամբ ինքնասպանության հասցնելու հատկանիշներով քրեական վարույթ է նախաձեռնել (հոդված 162, առավելագույն պատիժն ազատազրկում՝ 2 տարով-խմբ․)։
«Հայաստան» դաշինքի պատգամավոր Ագնեսա Խամոյանը քարոզարշավի ժամանակ հայտնել է, որ Հովհաննիսյանին ձերբակալել էին «Քաղաքացիական պայմանագրի» պաստառը պոկելու համար։
Թարմացված է՝ 17.05.2026 | 16։07
