Մայիսի 16-ին Հայաստանը կմիանա «Թանգարանների գիշեր» համաեվրոպական միջոցառմանը, թանգարանների մուտքը կլինի անվճար, տեղեկացրել են ՀՀ կրթության, գիտության, մշակույթի և սպորտի նախարարությունից։
Նշվում է, որ մայիսի 16-ին ծրագրին միացած թանգարաններն անվճար կընդունեն այցելուներին ժամը 11:00-24:00-ն, իսկ մայիսի 18-ին՝ Թանգարանների միջազգային օրը, ըստ հիմնական այցելության ժամերի:
ԿԳՄՍ-ն խոստանում է, որ այցելուները հնարավորություն կունենան բացահայտել թանգարանային հավաքածուները նոր ձևաչափով, մասնակցել ինտերակտիվ միջոցառումների և վայելել մշակութային հարուստ միջավայր (ծրագիրն ամբողջությամբ՝ նախարարության կայքում)։
Թանգարանների միջազգային օրն այս տարի կրում է «Թանգարանները միավորում են մասնատված աշխարհը» խորագիրը՝ ընդգծելով թանգարանների առանցքային դերը՝ որպես մշակութային երկխոսության, փոխըմբռնման և համամարդկային արժեքների պահպանման ու փոխանցման հարթակներ։
Հայաստանի թանգարանները կազմակերպելու են բազմաբովանդակ միջոցառումներ՝ ցուցահանդեսներ, կրթական ծրագրեր, վարպետաց դասեր, հանրային քննարկումներ և հատուկ այցելություններ։
Թանգարանների միջազգային օրը սահմանվել է 1977 թվականին Թանգարանների միջազգային խորհրդի կողմից (ԻԿՕՄ)՝ նպատակ ունենալով համախմբել թանգարաններին հասարակության և մարդկության առջև ծառացած գլոբալ մարտահրավերների շուրջ՝ միաժամանակ բարձրացնելով հանրային իրազեկվածությունը թանգարանների կարևորագույն դերի մասին:
Հայաստանը միացել է «Թանգարանների գիշեր» համաեվրոպական միջոցառմանը 2005-ից:
