Կալիֆոռնիա նահանգի Ֆաուլեր քաղաքի քաղաքապետը թույլ չի տվել քաղաքային խորհրդի հայազգի ներկայացուցչին ելույթ ունենալ Հայոց ցեղասպանության հիշատակի միջոցառման ժամանակ՝ համեմատելով արարողությունը քվինսեանիերայի՝ լատինաամերիկյան մշակույթում 15-ամյակի ավանդական տոնակատարության հետ, հայտնել է The San Joaquin Valley Sun-ը։
Վեճը տեղի էր ունեցել ապրիլի 26-ին՝ Դոնի Ռայթ այգում տեղի ունեցած Հայոց ցեղասպանության հիշատակի միջոցառումից հետո։ Քաղաքային խորհրդի անդամ Կարնիգ Ղազարյանը, որը ցեղասպանությունը վերապրածի թոռ է, հայտարարել է, որ իրեն չեն հրավիրել ելույթ ունենալու արարողությանը, իսկ ավելի ուշ նրան զրկել են նույնիսկ կարճ ելույթ ունենալու հնարավորությունից։
«Ես չեմ հրաժարվել մասնակցել։ Ինձ չեն հրավիրել, իսկ հետո ինձ մերժել են»,- ասել է Ղազարյանը քաղաքային խորհրդի նիստում և պնդել, որ միջոցառումն «անձի ճանաչման» մասին չէր, այլ այն անձի ներգրավման, որի ընտանիքն անմիջականորեն կապված է ողբերգության հետ։
Ֆաուլերի քաղաքապետ Խուան Մեխիան պատասխանել է, որ արարողությունը «մասնավոր միջոցառում» էր, այլ ոչ թե պաշտոնական քաղաքային միջոցառում։ Նա Ղազարյանի՝ հուշարձանի մոտ ելույթ ունենալու ցանկությունը համեմատել է քաղաքային այգում ուրիշի քվինսեաներային մասնակցելու և բեմից ելույթ ունենալու պահանջի հետ։
Ֆաուլերը համարվում է ԱՄՆ հայերի արտագաղթի պատմական կենտրոններից մեկը. Հայոց ցեղասպանությունից հետո քաղաքի բնակիչների զգալի մասը հայկական ծագմամբ էր։ Կազմակերպիչներն այժմ միջոցներ են հավաքում ցեղասպանության զոհերի հիշատակին նվիրված մշտական հուշարձանի համար։
