Իշխանությունները ձգտում են, որպեսզի մենք մեզ չասոցացնենք հաղթանակի հետ, հայտարարել է «Ուժեղ Հայաստան» կուսակցության քաղխորհրդի անդամ Նարեկ Կարապետյանը։
Նա կուսակցության ներկայացուցիչների հետ Հաղթանակի 81-ամյակի կապակցությամբ ծաղիկներ է խոնարհել Երևանի «Հաղթանակ» զբոսայգու Անմար կրակի մոտ։ Կարապետյանը նշել է, որ այսօր փորձ է արվում հայ ժողովրդի ենթագիտակցության մեջ նստեցնել այն միտքը, թե մենք չենք կարող հաղթանակներ ունենալ:
«Այսօր ուզում են հայ և հաղթանակ բառերն իրարից հեռացնել։ Ենթագիտակցորեն՝ մեր մեջ ուզում են նստեցնել, որ չենք կարող ունենալ հաղթանակ: Ինչո՞ւ չենք կարող, կարող ենք, բայց ապագա հաղթանակները կլինեն աշխատանքային հաղթանակներ: Բարեկեցությունն է այն հաղթանակը, որով մենք տարածաշրջանում մեր դերը ֆիքսելու ենք»,- նշել է նա:
Անդրադառնալով ներկայիս իշխանությունների քաղաքականությանը և Արցախի հարցում նրանց դիրքորոշմանը՝ Կարապետյանը հիշեցրել է ՀՀ վարչապետ Նիկոլ Փաշինյանի հայտարարությունների հակասությունն ու դրա հետևանքները:
«Մեր սխալն այն էր, որ իրենց վստահեցինք մեր երկրի անվտանգությունը: Չի կարելի ներել այդքան սխալներ, եթե այդ սխալներն արժեք ունեն, իսկ արժեքը հազարավոր զոհերն են»,- նշել է Կարապետյանը:
Խոսելով նախընտրական քարոզարշավի, մարզային այցելությունների մասին և մեկնաբանելով վարչապետի խոսքերը, թե Անգեղակոթ գյուղում Բրեժնևի ժամանակներից ի վեր ասֆալտ չի արվել՝ քաղաքական գործիչը քննադատել է իշխանության մոտեցումները՝ նշելով, որ Սիսիանի շրջանում համատարած աղքատություն է, և միայն ասֆալտապատմամբ հարցեր չեն լուծվում։
«Պարտք վերցնել ու «ռեմոնտ» անել բոլորն էլ կարող են, մենք պետք է մարդկանց աշխատանքով ապահովենք»,- ընդգծել է նա:
Armenia Today-ի խնդրանքին՝ մարզային այցելությունների արդյունքում գնահատել իշխանությունների և ժողովրդի միջև հաղորդակցության ու հետադարձ կապի մեխանիզմները, Կարապետյանը հայտարարել է, որ առկա է որոշակի «դրական դինամիկա», որը պետք է զարգացնել։
Նա նաև հայտնել է, որ իշխանության գալու դեպքում կուսակցությունը նախատեսում է ստեղծել հատուկ գրասենյակ՝ քաղաքացիների դիմումների մշակման, նրանց անձնական և տեխնիկական հարցերի լուծման համար։ Նրա խոսքով՝ այդ խնդիրների մեծ մասը զուտ տեխնիկական լուծումներ են պահանջում և պետական միջոցների լուրջ ծախսեր չեն ենթադրում։
Հունվարին Կարապետյանը ներկայացրել էր Սամվել Կարապետյանի կողմից առաջարկված տնտեսական զարգացման հայեցակարգը։ Այն բաղկացած է հինգ առանցքային քայլից, որոնք, ըստ նախաձեռնողների, կապահովեն Հայաստանի տնտեսական թռիչքն ու ժողովրդագրական կայունությունը։
«Մեր ձևով» շարժումն ավելի վաղ առաջարկել էր Մեղրիի զարգացման ծրագիր՝ կենտրոնանալով էներգետիկայի, լոգիստիկայի և բնակարանաշինության վրա, Գեղարքունիքի մարզի զարգացման ծրագիր՝ կենտրոնանալով Սևանա լճում ձմեռային զբոսաշրջության և ձկնաբուծության վրա, ինչպես նաև Հայաստանի քաղաքներում ու գյուղերում գործազրկության կրճատման ծրագիր:
Շարժումը տեղեկացրել էր նաև Ալավերդու կենտրոնական զբոսայգու վերակառուցման ծրագրերի մասին և առաջարկել Վանաձորում երկու արդյունաբերական նախագիծ՝ պարարտանյութերի արտադրության քիմիական գործարանի վերականգնում և քաղաքում նավթի վերամշակման կենտրոնի ստեղծում։ Շարժումը նաև մեկնարկել էր էլեկտրաէներգիայի սակագների նվազեցման համազգային ստորագրահավաք, առաջարկել Սյունիքի մարզի 5 շրջանի զարգացման տեսլական։
