«Մեր ձևով» շարժման համակարգող Նարեկ Կարապետյանը ներկայացրել է Սյունիքի մարզի 5 շրջանի` Սիսիանի, Կապանի, Քաջարանի, Մեղրիի և Գորիսի զարգացման՝ շարժման առաջարկած տեսլականը։
Նա նաև նշել է TRIPP ( Trump's Route for International Peace and Prosperity) նախագծի զարգացման հնարավորությունները և խոսել Հյուսիս-հարավ երթուղու երկայնքով տարածաշրջանում տարանցիկ հանգույց ձևավորելու շարժման առաջարկի մասին՝ Հայաստանի համար միջազգային անվտանգության երաշխիքներով։
Անասնապահության զարգացում և կաթի գնի սուբսիդավորում Սիսիանում
Ընդգծելով, որ Սիսիանը կարևոր գյուղատնտեսական շրջան է, որի հիմնական ուղղվածությունն անասնապահությունն է, Կարապետյանը մատնանշել է շարժման առաջարկը՝ սուբսիդավորել կաթի գինը և կազմակերպել դրա վերամշակումը։
Նա ավելացրել է, որ այդ քայլերը՝ անասնապահության զարգացումը և գյուղացիների լավ վճարվող աշխատանքը, կապահովեն շրջանի բարեկեցությունը։ Ըստ Կարապետյանի՝ կաթի վերամշակումը լինելու է Սիսիան քաղաքի և շրջանի զարգացման հիմնական ուղղությունը։
Հարկերի մի մասի հետվերադարձ Քաջարանում և Կապանում
Կարապետյանը նշել է, որ Քաջարանը և Կապանը Հայաստանի ամենաբարեկեցիկ շրջաններից են՝ հաշվի առնելով, որ այնտեղ են գտնվում Հայաստանի ամենամեծ հանքերը: Այս երկու համայնքի համար շարժումն առաջարկում է տեղական ինքնակառավարման ոլորտում բարեփոխումներ։
«Քաջարանի և Կապանի համար առաջարկում ենք, ու Հայաստանի բոլոր շրջանների համար էլ դա տեղայնացնելու ենք, որ հարկերի մի մասը, որոնք վճարվում են այդ շրջանից, մնան այդ շրջանում»,- նշել է շարժման համակարգողը։
Կարապետյանը շեշտել է, որ այս շրջանները ներկայումս միլիարդավոր դրամի հարկեր են վճարում պետական բյուջե, սակայն համայնքները գրեթե ոչ մի եկամուտ չեն ստանում դրանից։ Այս համայնքների համար շարժումը նախատեսում է հարկերի մի մասն օգտագործել ավելի բարեկեցիկ միջավայր ապահովելու համար։
Դա, ըստ նրա, կբերի տարածքային համաչափ զարգացումից բացի, ակտիվ զարգացման, բարեկեցիկ միջավայրի ձևավորման, և ՏԻՄ-ը կունենա մեծ ֆինանսական միջոցներ բարեկարգելու քաղաքները։ Բացի ենթակառուցվածքներից, Կարապետյանի խոսքով, տարածաշրջանային բյուջեի համալրումը տեղական իշխանություններին հնարավորություն կտա մշակել միջոցառումներ՝ բիզնեսին աջակցելու համար։
«Հարկերի մի մասը պետք է վերադարձվի համայնքներին, դա նաև կմոտիվացնի տեղի քաղաքապետերին, համայնքապետերին, որպեսզի նրանք ավելի շատ ջանք թափեն բիզնեսների հիմնման, կայացման ուղղությամբ»,- ասել է նա։
Իրանի հետ առևտրի աշխուժացում Մեղրիի համար
Կարապետյանի խոսքով՝ Մեղրին կաշխատի Իրանի հետ առևտրի, հումքի փոխանակման, վերամշակման ուղղությամբ։ Ըստ նրա՝ Մեղրին շատ մեծ պոտենցիալ ունի, քանի որ գտնվում է գյուղատնտեսական յուրահատուկ շրջանում և կարող է արտադրել մրգեր և այլ տեսակի գյուղատնտեսական ապրանքներ։ Շարժումն ավելի վաղ մանրամասն խոսել էր Մեղրիի զարգացման ծրագրերի մասին։
Գորիսը՝ հայկական ռազմական մտքի կենտրոն
Կարապետյանը նկատել է, որ Գորիսի ունիկալությունը կայանում է նրանում, որ մարդիկ հետաքրքրված են ռազմական թեմատիկայով, երկրի պաշտպանողական բարձրացման մասին քննարկումներով։ Շարժումն առաջարկում է քաղաքը դարձնել ՀՀ ռազմական կրթության, Պաշտպանության նախարարության գիտակրթական կենտրոն։
«Գորիսն ամենահայրենասեր շրջաններից է և միշտ հանդիսացել է հայկական բոլոր հակամարտությունների առաջնագծում։ Մեր առաջարկն է, որ Գորիսը դառնա հայկական ռազմական կրթության կենտրոնը․ նոր տեխնոլոգիաների, դրոնների կառավարման, ռազմական ամբողջ ուսումնական հաստատությունների կենտրոնը»,- ասել է նա։
Դրանով, ըստ Կարապետյանի, հնարավոր կլինի բնակիչների ռազմական ոգին օգտագործել, ուղղորդել ի բարօրություն Հայաստանի պաշտպանունակության։
Միջազգային անվտանգության երաշխիքներ խաղաղության պայմանագրի և Հյուսիս-հարավ տարանցիկ ճանապարհի համար
Կարապետյանը նշել է, որ Սյունիքով անցնող ճանապարհը տրամադրելով՝ Հայաստանի իշխանություններն ստացան միայն խաղաղության խոստում։ Խոսելով Սյունիքով անցնելիք ճանապարհի՝ TRIPP-ի մասին, Կարապետյանը շեշտել է, որ խաղաղության հասնելու համար ամենօրյա աշխատանք է պետք տանել։
Նրա խոսքով՝ ԱՄՆ-ի մասնակցությունը TRIPP նախագծում ողջունելի է, սակայն նախագծի վերաբերյալ համաձայնագրում ԱՄՆ նախագահ Դոնալդ Թրամփը նշված է որպես համաձայնագրի վկա։ Ըստ Կարապետյանի՝ անհրաժեշտ է երաշխավոր, որն ավելի մեծ նշանակություն կտա մեր տարածաշրջանին և երաշխիքներ կտրամադրի։
«Ի տարբերություն մեր կառավարության, որն առանց երաշխավորի է մտել խաղաղության պայմանագրի գործընթացի մեջ, մենք տեսնում ենք, որ երկու, երեք երաշխավոր է պետք, որպեսզի ունենանք երաշխավորված խաղաղություն, քանի որ թուղթը, որի վրա թուրքերի հետ ստորագրվել է պայմանագիր, հետագայում զրո արժեք է ունենալու թուրքերի համար, երբ նրանք տեսնեն, որ չկա երաշխավոր, ով կմասնակցի պաշտպանությանը և կստիպի իրենց հարգել իրենց իսկ ստորագրությունը»,- ասել է նա։
Կարապետյանը շեշտել է, որ պետք է հասնել նրան, որ լինի կոնկրետ երաշխավոր, որն ավելի նշանակալի կարևորություն է տալու այս տարածաշրջանին։
Շարժման համակարգողը նաև ընդգծել է Սյունիքը որպես Հյուսիս-հարավ երթուղու ամենակարևոր հայկական տարանցիկ ուղու օգտագործման անհրաժեշտությունը։ Նրա խոսքով՝ պետք է «թուրքական Արևմուտք-արևելք օրակարգին հակադրել Հյուսիս-հարավը»։
Ըստ Կարապետյանի՝ եթե Հյուսիս-հարավ երթուղին պետք է դառնա տրանսպորտային խոշոր զարկերակ, ապա անհրաժեշտ է դրա համար ներգրավել նաև երաշխավորներ, որպեսզի նրանք կարողանան ապահովել Սյունիքի և ամբողջ Հայաստանի անվտանգությունը։
«Մենք նաև դրա վրա ենք երաշխավոր ուզելու, որպեսզի երաշխավորներ լինեն, որոնք կապահովեն Սյունիքի և ամբողջ Հայաստանի անվտանգությունը։ Դրանով կունենանք չեզոք, անվտանգ երկրի ստատուս, ում անվտանգությունը երաշխավորվում է Արևելք-արևմուտք ճանապարհների ուղղությամբ: Եվ Հայաստանն իր լոգիստիկ թուլությունը, որ մինչև հիմա համարվում էր թուլություն, կդարձնի առավելություն»,- հավելել է նա։
Հունիսին «Տաշիր» ընկերությունների խմբի նախագահ Սամվել Կարապետյանին կալանավորել էին եկեղեցու դեմ արշավը քննադատելուց հետո, օգոստոսին նա հայտարարել էր «Մեր ձևով» ժողովրդական շարժման ստեղծման մասին, որն սկզբում կլինի ապաքաղաքական, այնուհետ քաղաքական հայտ կներկայացնի։
«Մեր ձևով»-ն առաջարկել էր Մեղրիի զարգացման ծրագիր՝ կենտրոնանալով էներգետիկայի, լոգիստիկայի և բնակարանաշինության վրա, Գեղարքունիքի մարզի զարգացման ծրագիր՝ կենտրոնանալով Սևանա լճում ձմեռային զբոսաշրջության և ձկնաբուծության վրա, ինչպես նաև Հայաստանի քաղաքներում ու գյուղերում գործազրկության կրճատման ծրագիր: Շարժումը տեղեկացրել էր նաև Ալավերդու կենտրոնական զբոսայգու վերակառուցման ծրագրերի մասին և առաջարկել Վանաձորում երկու արդյունաբերական նախագիծ՝ պարարտանյութերի արտադրության քիմիական գործարանի վերականգնում և քաղաքում նավթի վերամշակման կենտրոնի ստեղծում։ Շարժումը նաև մեկնարկել էր էլեկտրաէներգիայի սակագների նվազեցման համազգային ստորագրահավաք:
