«Ուժեղ Հայաստան» կուսակցության վարչապետի թեկնածու Սամվել Կարապետյանի փաստաբանները նրա տնային կալանքը փոխելու միջնորդություն են ներկայացրել դատարան, հայտարարել է փաստաբան Արամ Վարդևանյանը։ Փաստաբանական խմբի ճեպազրույցի ուղիղ հեռարձակումը՝ Armenia Today-ի Youtube-ի ալիքում։
Փաստաբանական խումբը միջնորդել է ապրիլի 15-ին կայանալիք դատական նիստում խափանման միջոցի հարցը քննարկել առաջնահերթ՝ կապված հունիսին կայանալիք ԱԺ ընտրությունների և նախընտրական գործընթացների հետ, որոնց պետք է մասնակցի նաև Կարապետյանը։
Վարդևանյանը նշել է, որ խորհրդարանական ընտրություններին ընդառաջ ապրիլի 21-ին «Ուժեղ Հայաստան» կուսակցությունը հրավիրելու է համագումար։ Միջնորդության հիմքում համագումարին Կարապետյանի մասնակցությունն ապահովելն է։
«Կարևոր ենք համարում, որ մինչ այդ Կարապետյանը հնարավորություն ունենա լիարժեք մասնակցել քաղաքական գործընթացներին, քանի որ կուսակցության նախագահի մասնակցությունն առանցքային է։ Մրցակցության և ընտրական հավասար պայմանների ապահովման տեսանկյունից սա անհրաժեշտ է»,- հավելել է Վարդևանյանը։
Փաստաբանները նաև հայտնել են, որ Հանրային հեռուստաընկերության եթերում գործով հսկող դատախազ Արգամ Դալլաքյանը խախտել է Կարապետյանի անմեղության կանխավարկածը։ Նրանք հայտարարել են, որ պատրաստ են նույն պայմաններում ներկայացնել նաև իրենց դիրքորոշումը և խոսել, մասնավորապես, դատախազության կողմից թույլ տրված խախտումների մասին։
Փաստաբան Արշակ Վարդանյանը հայտնել է, որ Կարապետյանի գործով հարցաքննվել է 40 անձ, որոնցից ոչ ոք փաստական տվյալներ չի ներկայացրել։ Նա հավելել է, որ կատարվել է 81 զննություն, որոնք վերաբերում են բացառապես փաստաթղթերի ուսումնասիրությանը, և այդ փաստաթղթերից որևէ մեկում Կարապետյանի անունը չի հիշատակվում։
«Սովորաբար կալանքը կիրառվում է անձի պատշաճ վարքագիծն ապահովելու նպատակով։ Սակայն այս դեպքում տեսնում ենք հակառակը։ Տարբեր վարույթներ միացվել և համատեղ քննվել են մեկ նպատակով՝ Կարապետյանին ազատությունից զրկելու համար»,- հավելել է փաստաբանը՝ ընդգծելով, որ գործը բաղկացած է 135 հատորից։
Փաստաբանական խմբի անդամները նշել են, որ ապրիլի 15-ին սկսվող դատաքննությունը կպարզի բոլոր հարցերը, և հանրությանը հայտնի կդառնան ինչպես գործի հանգամանքները, այնպես էլ դրա նախաձեռնման պատճառները։
Կարապետյանին կալանավորել էին 2025-ի հունիսին՝ եկեղեցու դեմ արշավը քննադատելուց հետո։ Ավելի քան վեց ամիս անազատության մեջ անցկացնելուց հետո՝ դեկտեմբերի 30-ից, նրա նկատմամբ խափանման միջոց էր կիրառվել տնային կալանքը և գրավը։
Փետրվարի 11-ին Կարապետյանը միաձայն ընտրվել էր «Ուժեղ Հայաստան» կուսակցության նախագահ: Դատարանը մարտի 14-ին ևս մեկ ամսով երկարաձգել էր նրա տնային կալանքը: «Ուժեղ Հայաստանն» ավելի ուշ հրապարակել էր ընտրություններին մասնակցող առաջին 36 թեկնածուի անունները։
