Երևանի Սուրբ Աննա եկեղեցում վարչապետ Նիկոլ Փաշինյանի հետ միջադեպի վարույթով կալանավորված 18-ամյա Դավիթ Մինասյանը, «Արմավիր» քրեակատարողական հիմնարկ չհասած՝ գիտակցությունը կորցրել է, հայտնում է նրա փաստաբան Լուսինե Մարտիրոսյանը։
Փաստաբանի փոխանցմամբ՝ նրան հիվանդանոց են տեղափոխել։
Քրեակատարողական ծառայության մամուլի խոսնակ Նոնա Նավիկյանն ավելի ուշ Armenia Today-ին հայտնել է, որ Մինասյանին ՔԿՀ Ներքին գործերի նախարարության մեքենայով են տեղափոխել։
«Մեքենան մուտք է գործել ՔԿՀ բակ, և ոստիկաններն այդ ընթացքում արդեն շտապօգնություն են կանչել»,- ասել է Նավիկյանը՝ շեշտելով, որ Մինասյանը ՔԿՀ մուտք չի գործել։
Ավելի ուշ փաստաբանն Armenia Today-ին հայտնել է, որ Մինասյանին հիվանդանոց տեղափոխելուց անմիջապես հետո նորից ՔԿՀ են տարել։
Փաստաբանի խոսքով՝ իմիջայլոց հետազոտություն է իրականացվել։
«Նույնիսկ չսպասեցին, որ առողջական վիճակի վերաբերյալ թղթերը համադրեն, հասկանան՝ գիտակցության կորուստն ինչի՞ց կարող էր լինել»,- մանրամասնել է փաստաբանը։
Անդրադառնալով տղայի առողջական վիճակին՝ փաստաբանը տեղեկացրել է՝ հասցրել են միայն տեսնել, որ գիտակցության է եկել։ Նա հավելել է, որ այս պահին գնում են «Արմավիր» ՔԿՀ։
Մինասյանի և Փաշինյանի միջև միջադեպ էր տեղի ունեցել մարտի 29-ին՝ Սուրբ Աննա եկեղեցում պատարագին։ Ըստ տեսանյութերի՝ պատարագի ընթացքում նա Փաշինյանին ասել էր, որ «ինքն ուզում է մեջտեղում կանգնել», երբ վարչապետն անվտանգության աշխատակիցների ու մյուս պաշտոնյաների հետ փորձում էր դուրս գալ եկեղեցուց՝ պատարագը դեռ չավարտված: Արդյունքում՝ քաշքշոց էր սկսվել։ Դեպքի առնչությամբ ձերբակալվել էին Մինասյանը, իր երկվորյակ եղբայրը՝ Միքայել Մինասյանը, և «Համահայկական ճակատ» շարժման հիմնադիր Գևորգ Գևորգյանը։
Միջադեպի առթիվ քրեական վարույթ էր նախաձեռնվել, ավելի ուշ նրանց նկատմամբ քրեական հետապնդում էր հարուցվել։ Միքայել Մինասյանը և Գևորգյանն ազատ էին արձակվել մարտի 31-ին՝ գրավի ու բացակայելու արգելքի հիմքով, իսկ Դավիթ Մինասյանին կալանավորելու միջնորդություն էր ներկայացվել։ Ապրիլի 1-ին Դավիթ Մինասյանին 2 ամսով կալանավորելու որոշում էր կայացվել։
Կարդացեք նաև՝
Թարմացված է՝ 01.04.2026 | 16:21
