Շվեյցարիայի Համադաշնությունում գործող Հայաստանի Հանրապետության դեսպանությունը Ժնևից կտեղափոխվի Բեռն, ԱԳՆ նախագծին կառավարությունը հավանություն է տվել փետրվարի 12-ի նիստում։
2002 թվականից Ժնևում գործում է ՀՀ դեսպանությունը և ՄԱԿ-ի գրասենյակում ու այլ միջազգային կազմակերպություններում ՀՀ մշտական ներկայացուցչությունը։
Հաշվի առնելով մայրաքաղաք Բեռնի և Ժնևի միջև հեռավորությունը, ինչպես նաև երկկողմ և բազմակողմ օրակարգերի առանձնահատկությունները՝ անհրաժեշտություն է առաջացել դեսպանությունը տեղափոխել Բեռն։
Նախագծի հիմնավորման համաձայն՝ Շվեյցարիայում հավատարմագրված շուրջ 100 դեսպանություն, այդ թվում՝ Ադրբեջանի, Թուրքիայի, Իրանի և Վրաստանի, տեղակայված են հենց Բեռնում։ Ըստ ԱԳՆ-ի՝ դեսպանության տեղափոխումը հնարավորություն կտա առավել արդյունավետ կազմակերպել շփումները դիվանագիտական կորպուսի ներկայացուցիչների հետ, ակտիվացնել քաղաքական երկխոսությունը և խթանել երկկողմ համագործակցությունը։
Միևնույն ժամանակ՝ Ժնևում կշարունակի գործել ՄԱԿ-ի գրասենյակում և այլ միջազգային կազմակերպություններում ՀՀ մշտական ներկայացուցչությունը։
Ֆինանսական հաշվարկների համաձայն՝ դեսպանության տեղափոխման տարեկան ծախսերը կկազմեն 344,8 հազար շվեյցարական ֆրանկին համարժեք դրամ (շուրջ 167 մլն դրամ-խմբ․)։ Առաջին տարում լրացուցիչ կպահանջվի ևս 62,8 հազար շվեյցարական ֆրանկին համարժեք դրամ (շուրջ 30 մլն դրամ-խմբ․)՝ կահույքի, տեխնիկայի ձեռքբերման, դեպոզիտի և միջնորդավճարի համար։
Նախագծի ընդունման դեպքում 2026 թվականի պետական բյուջեով ԱԳՆ-ի՝ համապատասխան միջոցառման ծախսերը կավելանան 407,5 հազար շվեյցարական ֆրանկին համարժեք դրամով (շուրջ 198 մլն դրամ-խմբ․), իսկ հաջորդող տարիներին՝ տարեկան 304,8 հազար շվեյցարական ֆրանկին համարժեք դրամով (148 մլն դրամ-խմբ․)։
