Հայ Առաքելական եկեղեցու (ՀԱԵ) ծառայողների դեմ՝ Մասյացոտնի թեմի նախկին առաջնորդի պարտականությունների կատարմանը խոչընդոտելու պատճառով հարուցված քրեական գործը նպատակ ունի խանգարել Եպիսկոպոսաց ժողովի անցկացումը՝ դրա մասնակիցների համար բացակայելու արգելք սահմանելով, հայտարարել է փաստաբան Ռուբեն Մելիքյանը։
Ավելի վաղ Քննչական կոմիտեն կարգալույծ եպիսկոպոս, Մասյացոտնի թեմի նախկին առաջնորդ Արման Սարոյանի (օծյալ անունը՝ Գևորգ-խմբ.) մասով դատական ակտը չկատարելու և կարգալույծ հայտարարելու հիմքով քրեական վարույթ էր նախաձեռնել։
Փաստաբանը նշել է, որ իշխանությունների գործողություններից հետո Ամենայն Հայոց կաթողիկոս Գարեգին Բ-ն որոշել էր Եպիսկոպոսաց ժողովն անցկացնել արտասահմանում, քանի որ ժողովի ազատ անցկացումը Հայաստանում երաշխավորված չէր։ Դրանից հետո իշխանությանն աջակցող 10 եպիսկոպոսներ դեմ էին արտահայտվել ժողովի տեղը փոխելու որոշմանը։ Մելիքյանի խոսքով՝ այս գործն արագորեն ի հայտ է եկել «հետաքրքիր զուգադիպությամբ»։
«Սա հատուկ ուղերձ է, որի նպատակը բացառապես վեհափառի և Գերագույն հոգևոր խորհրդի անդամների նկատմամբ բացակայելու արգելք խափանման միջոց կիրառելու համար, որ չկարողանան Հայաստանից դուրս գալ»,- ասել է փաստաբանը՝ ընդգծելով, որ իշխանությունները փորձում են խոչընդոտել Հայ Առաքելական եկեղեցու բնականոն գործունեությանը, մասնավորապես՝ Եպիսկոպոսաց ժողովի գումարմանը:
Նա բացատրել է, որ բացակայելու արգելք սահմանելու հնարավորությունը պայմանավորված է նրանով, որ գործը վերաբերում է ոչ մեծ ծանրության արարքի, որի համար Քրեական օրենսգիրքը նախատեսում է մինչև երկու տարվա ազատազրկում, իսկ եթե այն կատարվում է առաջին անգամ՝ կիրառվում են այլընտրանքային պատժատեսակներ: Մելիքյանը, որպես գործի մաս, նշել է Էջմիածնի Մայր Աթոռում խուզարկություններ անցկացնելու հնարավորությունը:
Փաստաբանի խոսքով՝ գործը նաև հիմք է հանդիսանում կաթողիկոսի դեմ մեղադրանք առաջադրելու համար: Նշելով, որ եկեղեցու առաջնորդի՝ եպիսկոպոսին կարգալույծ անելու որոշումը չի կարող բողոքարկվել դատարանում, փաստաբանն ընդգծել է, որ իշխանությունների գործողություններն ուղղակի միջամտություն են եկեղեցու գործերին:
Հունվարի 13-ին Մայր Աթոռ Սուրբ Էջմիածնում տեղի ունեցած Գերագույն հոգևոր խորհրդի ժողովի ժամանակ որոշվել էր Եպիսկոպոսաց ժողովն անցկացնել փետրվարին։ Ավելի ուշ՝ հունվարի 21-ին, ՀՀ վարչապետ Նիկոլ Փաշինյանին աջակցող եպիսկոպոսները կոչ էին արել չեղարկել ժողովը՝ նշելով, որ Ավստրիայում դրա անցկացումը «երկպառակություն է սերմանում» և «վարկաբեկում» է եկեղեցին։
