Հայաստանն առաջին անգամ կմասնակցի մարտի 11-ից մայիսի 29-ը Մալթայում կայանալիք արվեստի 2-րդ միջազգային բիենալեին, որն անցկացվում է «Մաքուր, պարզ, կտրված» խորագրի ներքո, հայտնել է ԿԳՄՍ նախարարությունը:
Հայաստանի ազգային տաղավարը ներկայանալու է նկարիչ և քանդակագործ Ռաֆֆի Ետալյանի «Այն բանի ձայնը, որը երբեք չի տեսնվել» նախագծով (համադրող՝ Սոնա Հովհաննիսյան):
Նախագիծն ընտրվել է ԿԳՄՍ նախարարության կողմից 2025 թվականի հունիսին հայտարարված մրցույթի արդյունքում:
Մալթայի արվեստի 2-րդ բիենալեին ներկայացվող նախագիծը քանդակային և ձայնային ինստալյացիա է, որը հանդիսատեսին հրավիրում է խորհրդածական վիրտուալ ճանապարհորդության՝ բացահայտելու տեսանելիի և անտեսանելիի, ներկայի և անցյալի հարաբերակցությունը:
Ետալյանը Հայաստանի նկարիչների, ինչպես նաև Լիբանանի նկարիչների և քանդակագործների միության անդամ է։ Նրա ստեղծագործությունները ներառում են հուշարձաններ, ինստալյացիաներ և հանրային արվեստի նախագծեր:
Այս տարի Մալթայի արվեստի 2-րդ բիենալեում ներկայացվելու է 47 նախագիծ, որոնք ընտրվել են աշխարհի 122 երկրից ստացված ավելի քան 3200 դիմումից։ Միջոցառման մասշտաբն ընդգծվում է ազգային և թեմատիկ 29 տաղավարով՝ բիենալեն դիրքավորելով որպես տարածաշրջանի խոշոր միջազգային մշակութային իրադարձություն։
