Եկեղեցուն աջակցելուց հետո կալանավորված «Տաշիր» ընկերությունների խմբի նախագահ Սամվել Կարապետյանի փաստաբանները նշել են այն սցենարը, որի դեպքում հայտարարելու են իրենց պաշտպանյալի գործով նիստերին և այլ գործընթացներին մասնակցելուց հրաժարվելու մասին։ Փաստաբանական խմբի ասուլիսի ուղիղ հեռարձակումը՝ Armenia Today-ի Youtube-ի ալիքում։
Ի՞նչ կլինի «անգործության և աբսուրդի» շարունակության դեպքում․ փաստաբանների առաջիկա քայլերը
Վերաքննիչ դատարանը դեկտեմբերի 11-ին մերժել էր Կարապետյանի կալանքը երկարացնելու դեմ բողոքը, ինչը փաստաբանները գործարարի նկատմամբ «քաղաքական հետապնդման շարունակություն» են համարում։
«Անկեղծորեն եմ ասում, աննախադեպ, խայտառակ, մեղմ ասած՝ ապօրինի, շինծու հետապնդում է։ Ապօրինի կալանքը տևում է արդեն 177 օր։ Ընդհանրապես, իրավաբանները կարողանում են իրավիճակի վերաբերյալ պատշաճ բացատրություն ներկայացնել, շահերի պաշտպանություն իրականացնել, բայց դա չի կարող լինել միակողմանի երևույթ։ Դրա համար պետք է լինեն անհրաժեշտ պայմաններ։ Կարապետյանի գործով Հայաստանում այդ անհրաժեշտ պայմաններն առկա չեն․ իրավունք, օրենք ընդհանրապես չեն գործում, նրա գործով հստակ առկա է իրավունքի և օրենքի ոչնչացման վճռական վարքագիծ»,- հայտարարել է փաստաբանական խմբի անդամ Արամ Վարդևանյանը։
Ի պատասխան Armenia Today-ի հարցին, թե այդ դեպքում որո՞նք են լինելու պաշտպանների առաջիկա քայլերը, Վարդևանյանը չի բացառել, որ քննչական խմբի «անգործության» պայմաններում կարող են առհասարակ հրաժարվել նաև դատական նիստերին մասնակցելուց։ Նա նշել է, որ գործընկեր փաստաբանների հետ քննարկելու են այդ հարցը։
«Մանրամասն քննարկում ենք ունենալու այդ մասին։ Մասնավորապես, եթե այս գործի վարույթի շրջանակներում 53 քննիչից բաղկացած քննչական խումբը շարունակի անգործությունը, մենք նորից գտնվենք դռնփակ, գաղտնի նախաքննության աբսուրդի պայմաններում, և նորից ներկայացվի կալանքը երկարաձգելու միջնորդություն, ընդհանրապես քննարկելու ենք մեր մասնակցության հարցը։ Քննարկելու ենք թե՛ դատական նիստի, թե՛ առհասարակ մեր մասնակցության հարցը, որովհետև Հայաստանում շատ երևույթներ ենք տեսել, բայց նման աբսուրդ չենք տեսել,»,- հայտարարել է Վարդևանյանը։
Փաստաբանը հավելել է՝ 2023-ից ՀՀ-ում խափանման միջոցների բազմաթիվ տեսակներ կան, որոնց վերաբերյալ դատարանը մերժում է կիրառել։ Նա հայտնել է, որ նույնիսկ միջնորդել են գրավ և տնային կալանք կիրառել, ինչը դատարանը գործին «խոչընդոտելու ռիսկ» է համարել։
«Խնդրում ենք ձեզ (լրագրողներին-խմբ․)՝ առիթ ունենալու դեպքում պահանջեք, թող նախաքննական գաղտնիքին վերջ տան․ կա՛մ գործն ուղարկեն դատարան, կա՛մ կարճեն, դրանով իրավիճակի փոփոխություն կունենանք։ Հակառակ դեպքում՝ ինչպես արձանագրեցինք գործընկերներով, Կարապետյանի խափանման միջոցի ժամկետը հունվարին է լրանում, քննարկման առարկա կդարձնենք՝ ընդհանրապես մասնակցելո՞ւ ենք դրան, թե՞ ոչ»,- նշել է փաստաբանը։
Խուզարկություն ու հարցաքննություններ են տեղի ունեցել
Փաստաբան Արշակ Վարդանյանը տեղեկացրել է, որ հարցաքննություններ են իրականացվել պաշտպանական կողմի ներգրավված հոգեբանների և լեզվաբանների շրջանում։ Նրանց փաստաբանները ներգրավվել էին՝ գործարարի կալանքի պատճառ դարձած հարցազրույցում նրա ժեստիկուլացիան և խոսքը վերլուծելու համար։
Վարդանյանը տեղեկացրել է, որ դեկտեմբերի 11-ին քննիչները խուզարկել էին լեզվաբանական բնագավառի փորձագետներից մեկի տունը։ Նա նշել է, որ փորձագետները եզրակացություն էին ներկայացրել այն մասին, որ Կարապետյանի խոսքում կոչ, առավել ևս՝ բռնության կոչ չկա։
«Եթե 53 անդամից բաղկացած քննչական խումբն այլ գործողություններ չունի անելու ու փորձագետների բնակարաններն է խուզարկում, այստեղ առանձնապես արդարություն, արդարադատություն, օբյեկտիվություն ակնկալելը, կարծում եմ, շատ դժվար չէ»,- նկատել է Վարդանյանը։
Գործարարի նկատմամբ քրեական վարույթի և Արցախի ներկայացուցչությունում կատարված խուզարկությունների կապը
Վարդևանյանն անդրադարձել է մամուլում շրջանառվող լուրերին, ըստ որոնց՝ «Արցախի ներկայացուցչությունում կատարված խուզարկությունների հիմքում» Կարապետյանի նկատմամբ նախաձեռնված քրվարույթն է։ Փաստաբանը հերքել է այդ տեղեկությունը։
«Կարապետյանը նշված գործողությունների հետ, նշված գործողությունների շրջանակներում հարուցված վարույթի հետ ունի զրո առնչություն։ Նախաքննական գաղտնիքը չլիներ, կհրապարակեինք նաև փաստաթղթեր։ Մեր ձեռքի տակ կան փաստաթուղթ և ցուցմունքներ առ այն, որ Կարապետյանը դրա հետ ոչ մի առնչություն չունի։ Այդ ամենը գիտեն քննչական մարմնում, դատարաններում, քանի որ առնվազն չորս դատական ակտ հաստատել է, որ այդ առնչությունը չկա»,- հայտարարել է Վարդևանյանը։
Վերջինիս խոսքով՝ Արցախի ներկայացուցչությունում կարող էին գտնել Կարապետյանի՝ 50 մլն-ից ավելի բարեգործությունները։
«Ավելի լավ կլիներ, որ քննիչները գնային ու Ստեփանակերտում կատարեին այդ քննչական գործողությունները։ Իրավական փոխօգնության շրջանակներում ադրբեջանցի քննիչները կարող էին բազմաթիվ փաստաթղթեր տալ Կարապետյանի դեմ, որի նկատմամբ հետախուզում են հայտարարել։ Թող իրավական փոխօգնությամբ դիմեն ու ստանան պատասխանը, թե ինչո՞ւ է Կարապետյանը բարեգործություն արել Արցախում»,- հավելել է փաստաբանը։
Վարդևանյանը տեղեկացրել է, որ Կարապետյանի նկատմամբ տեսակցությունների սահմանափակումը դեռևս առկա է։
Հունիսին Կարապետյանին կալանավորել էին եկեղեցու դեմ արշավը քննադատելուց հետո։ Դատարանն օգոստոսի 15-ից սկսած արդեն մի քանի անգամ երկարացրել է բարերարի կալանքը։ Նոյեմբերի 13-ին ՔԿ-ն Կարապետյանի կալանքը 2 ամսով երկարաձգելու միջնորդություն էր ներկայացրել, որը բավարարվել էր:
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
«Իրավական ամենաթողություն է»․ Սամվել Կարապետյանի փաստաբանները կբողոքարկեն կալանքը երկարաձգելու որոշումը
«Լսել մարդկանց և կիսել գաղափարները»․ կայացավ Սամվել Կարապետյանի «Մեր ձևով» շարժման շնորհանդեսը
