Կոռուպցիայի ընկալման համաթիվը (ԿԸՀ) 2024-ին Հայաստանի համար մնացել է նախորդ տարվա մակարդակին։ Հայաստանը 100-ից 47 միավոր ունի, տեղեկանում ենք Transparency International միջազգային կազմակերպության զեկույցից, որտեղ 0-ն նշանակում է կոռուպցիայի ամենաբարձր մակարդակ, իսկ 100-ը՝ կոռուպցիայի բացակայություն:
180 երկիր ընդգրկող վարկանիշային սանդղակում Հայաստանն զբաղեցրել է 63-64-րդ տեղերը՝ հորիզոնականը կիսելով Խորվաթիայի հետ: 2023 թվականին Հայաստանն զբաղեցրել էր 62-րդ տեղը։
Հայաստանի հարևաններից պակաս կոռումպացված է միայն Վրաստանը (53 միավոր)։ Մյուս երկրներն ավելի ցածր վարկանիշ ունեն․ Թուրքիան 100-ից ունի 34, Իրանը 23, Ադրբեջանը՝ 22 միավոր։ Ռուսաստանը 100-ից 22 միավոր ունի։ Հայաստանի կոռուպցիայի ընկալման 2024-ի համաթիվը և 47 միավորը հաշվարկել են՝ հիմք ընդունելով վեց աղբյուրի միջին արժեքը:
Դրանք ներառում են՝ «Բերթելսման» հիմնադրամը փոխակերպման 2024 թվականի ինդեքս (51 միավոր՝ 2023 թվականի 49-ի դիմաց), Freedom House-ի «պետությունները անցումային շրջանում» 2024-ի զեկույցի «կոռուպցիա» բաժինը (44 միավոր՝ անփոփոխ), Global Insight-ի երկրի ռիսկի 2024 ինդեքսը (46 միավոր՝ 2023 թվականի 47-ի դիմաց), Political Risk Services International-ի երկրի ռիսկի 2024-ի ինդեքսը (33 միավոր՝ 2023 թվականի 32-ի դիմաց), 2024-ի «Ժողովրդավարության բազմազանության» ծրագրի զեկույց (50 միավոր 2023-ի 55-ի դիմաց), 2024 թվականի համաշխարհային տնտեսական ֆորումի գործադիր տնօրենների տարեկան հետազոտություն (56 միավոր՝ 2023 թվականի 54-ի դիմաց)։
2022 թվականին Կոռուպցիայի ընկալման համաթվում Հայաստանն ընդգրկվել էր Արևելյան Եվրոպայի երկրների առաջատար եռյակում։ Այդ ժամանակից ի վեր էական բարելավումներ չկան, 2023 թվականին Հայաստանը ոչ մի միավորով չի բարձրացրել իր վարկանիշը։
