Հայաստանը Վրաստանից դեռ չի ստացել սահմանին հայկական բեռնատարների արգելափակման պատճառների հստակ բացատրություն, այսօր ճեպազրույցում ասել է ՀՀ էկոնոմիկայի նախարար Գևորգ Պապոյանը:
Նրա խոսքով՝ չնայած Վրաստանի էկոնոմիկայի նախարարի հետ ունեցած քննարկումներին, դեռևս պարզ չէ, թե կոնկրետ ի՞նչ պատճառներով են կանգնեցվել բեռնատարները:
«Վրաստանի էկոնոմիկայի նախարարն ինձ տեղեկացրեց, որ իրենց գերատեսչությունը կապ չունի այդ խնդրի հետ: Դա Ֆինանսների նախարարությանը ենթարկվող ֆինանսական ոստիկանությունն է, որը, ըստ իրենց, ինչ-որ ռիսկեր է տեսել ապրանքների հետ կապված: Ես խնդրել եմ հստակ նշել, թե ի՞նչ ռիսկերի մասին է խոսքը, սակայն մինչ օրս պարզաբանում չենք ստացել»,- նշել է Պապոյանը:
Նախարարը շեշտել է, որ իր համար կարևոր է հասկանալ՝ արդյոք խնդիրը կոնկրետ փաստաթղթային խախտումների հե՞տ է կապված, թե՞ պարզապես բեռնատարները կանգնեցված են առանց հստակ հիմնավորման: Նա հավելել է, որ որոշ մեքենաներ արդեն իսկ բաց են թողնվել, սակայն առանձին խմբաքանակների հետ կապված խնդիրը դեռ պահպանվում է:
Վրաստանի տարածքում, մասնավորապես, «Վերին Լարս»-ի մոտ, փետրվարի 12-ից արգելափակվել է ավելի քան 100 հայկական բեռնատար, հիմնականում՝ շինանյութերով բեռնված։ Վարորդները հայտնել են, որ փաստաթղթերի հետ խնդիրներ չունեն, սակայն վրացական կողմը հստակ բացատրություն չի տալիս։ Վրաստանի ֆինանսների նախարարությունից վստահեցրել էին, որ արհեստական խոչընդոտներ չեն ստեղծվում, և իրականացվում են ստանդարտ մաքսային հսկողության ընթացակարգեր։
