Արցախ միությունը շտապ կոչ է անում Եվրախորհրդարանի պատգամավորներին մեկնել Բաքու և ներկա գտնվել հայերի առաջիկա «դատական լսումներին»: Սա, ըստ միության, կարևոր քայլ է թափանցիկությունն ապահովելու, հետագա իրավախախտումները կանխելու և Ադրբեջանին միջազգային իրավունքի համաձայն պատասխանատվության ենթարկելու ուղղությամբ։
Արցախ միությունը Եվրոպական խորհրդարան է ուղարկել իր ու գործընկերների վերջին, ամենալայնածավալ զեկույցը՝ Ադրբեջանում ապօրինաբար պահվող 23 հայ պատանդների վերաբերյալ, որտեղ նշվում է, որ նրանցից 7-ն արդեն առերեսվել է կեղծ դատավճիռների՝ ստանալով 15-20 տարվա ազատազրկման պատիժ:
«Մյուս 16-ը Բաքվի ռազմական դատարաններում այժմ կանգնած է նմանատիպ բեմադրված դատավճիռների վտանգի առջև»,- նշված է հաղորդագրության մեջ:
Շեշտելով, որ հայ ռազմագերիների նկատմամբ Ադրբեջանի քրեական հետապնդումները քաղաքական բեմադրության վերածված գործընթացներ են, միությունը պնդել է, որ այս ամենը կազմում է ավելի լայն ռազմավարության մի մաս, որը կիրառվում է «մեղքը զոհերի վրա բարդելու և Լեռնային Ղարաբաղի էթնիկ հայ բնակչության դեմ կատարված հանցագործությունները կոծկելու նպատակով»:
Արցախ միությունը կոչ է անում միջազգային հանրությանը վճռական ու անհապաղ կերպով գործել:
Պաշտոնական տվյալների համաձայն՝ Ադրբեջանում պահվում է 23 հայ գերի։ Սեպտեմբերի 2-ին Կարմիր խաչի միջազգային կոմիտեն հայտարարել էր Ադրբեջանում իր գրասենյակը փակելու մասին։ Արցախի Ազգային ժողովի պատգամավոր Մետաքսա Հակոբյանը նոյեմբերի 26-ին ահազանգել էր, որ հայ գերիները և նրանց հարազատները ծանր իրավիճակում են հայտնվել ԿԽՄԿ-ի՝ Ադրբեջանում գործունեության դադարեցումից հետո:
