«Մեր ձևով»-ի հանրահավաքը ջղաձգել ու զարմացրել է իշխանություններին. ԶԼՄ

«Մեր ձևով» համահայկական շարժման շաբաթ օրվա հանրահավաքը հիստերիայի մեջ է գցել իշխանությանը, գրել է «Հրապարակ»-ը՝ հղում անելով իր աղբյուրներին:

Հանրահավաքից ժամեր առաջ «Քաղաքացիական պայմանագրի» պատգամավոր Խաչատուր Սուքիասյանի լցակայաններում, ըստ օրաթերթի, «անվճար բենզին» բաժանելու ակցիան բավականին խոչընդոտել է մասնակցությանը, բայց երբ հաշվարկը ցույց է տվել մի քանի տասնյակ հազար մարդու մասնակցություն, «գործի են անցել»։

Իշխանությունների՝ «Մեր ձևով»-ի նկատմամբ սևեռումն արտահայտվել է նաև հոկտեմբերի 20-ին Գյումրիի քաղաքպետ Վարդան Ղուկասյանի ձերբակալությունից հետո, երբ շարժման անունից աջակցություն են հայտնել քաղաքապետին, իսկ ՔՊ-ականները, մոռանալով Ղուկասյանին, լծվել են շարժմանը վարկաբեկելու գործին, հավելել է պարբերականը:

Թերթը նաև նշել է, որ վարչապետ Նիկոլ Փաշինյանը մտերիմների շրջապատում շարունակում է քննարկել արտահերթ ընտրությունների գնալու հարցը, որի գլխավոր «պատճառը» ևս շարժումն է:

«Մտածում են՝ ինչքան շուտ գնան ընտրության, այնքան Կարապետյանները չեն հասցնի պատրաստվել, և իրենց շանսերը կաճեն»,- ասված է հրապարակման մեջ։

«Իրավունք» թերթն էլ գրել է, որ հանրահավաքը «շոկային» ազդեցություն է ունեցել վարչապետի վրա: Նա մինչ այդ վստահ էր, որ փողոց հնարավոր է հանել առավելագույնը մի քանի հազար մարդու, սակայն հակառակի մեջ է համոզվել:

Հոկտեմբերի 20-ին կայացած հանրահավաքի ժամանակ փաստաբան Արամ Վարդևանյանը հայտարարել էր, որ «Տաշիր» ընկերությունների խմբի ղեկավար Սամվել Կարապետյանը կգլխավորի շարժման հիմքի վրա ստեղծվելիք քաղաքական կուսակցությունը: Շարժման համակարգող Նարեկ Կարապետյանը խոսել էր ՀՀ-ում խաղաղ ճանապարհով դեպի իշխանափոխություն տանող երեք քայլերի մասին։

Հունիսին Կարապետյանին կալանավորել էին եկեղեցու դեմ արշավը քննադատելուց հետո, օգոստոսին նա հայտարարել էր «Մեր ձևով» ժողովրդական շարժման ստեղծման մասին, որն սկզբում կլինի ապաքաղաքական, այնուհետ քաղաքական հայտ կներկայացնի։

Կարդացեք նաև՝