Երևանի «Ազատության» հրապարակում կայացած հանրահավաքի ժամանակ «Մեր ձևով» շարժման համակարգող Նարեկ Կարապետյանը խոսել է Հայաստանում խաղաղ իշխանափոխության քայլերի և շարժման ապագա ծրագրերի մասին:
Նա նշել է, որ «Մեր ձևով» շարժման անդամներն ու կամավորներն սկսում են շարժում՝ «Հայաստանի վատ շրջանի ավարտի և վերակառուցման շարժումը»: Կարապետյանի խոսքով՝ բոլորը պետք է աշխատեն և պատրաստ լինեն մասնակցել ընտրություններին:
«Մենք տեսնում ենք, որ հայ ժողովուրդն ունի հնարավորություն արդար ընտրություններով, լավ աշխատանքով իշխանությունից հեռացնել այս խմբակին»,- հայտարարել է Կարապետյանը:
Նա ընդգծել է, որ իշխող կուսակցության պարտությունն ընտրություններում պետք է այնքան վճռական լինի, որ ճնշման և վարչական ռեսուրսների միջոցով իր ստացած ձայները չազդեն արդյունքի վրա: Կարապետյանը շարժման կողմնակիցներին կոչ է արել ակտիվորեն աշխատել, շփվել մյուսների հետ և նրանց ճշմարտությունը փոխանցել:
«Այստեղ կան տասնյակ հազարավոր ՀՀ քաղաքացիներ։ Մեր շրջապատում պետք է բոլորի հետ խոսել, համբերատար պատմել ճշմարտությունը հարևաններին, բարեկաններին։ Սա է ճիշտ ճանապարհը։ Եթե ամեն մեկն այստեղ գտնվող տասնյակ հազարավոր մարդկանցից կարողանա երեք մարդու աչքերը բացել, որ նրանք ճիշտ քաղաքացիական դիրքորոշում ունենան, վստահեցնում եմ՝ մի քանի ամիս հետո մեր հասարակությունում իրավիճակը կատարյալ փոխված կլինի»,- ասել է նա՝ հավելելով, որ «այս հրապարակն է իր աշխատանքով որոշելու՝ իշխանափոխություն կլինի՞, թե՞ ոչ»:
Կարապետյանը նաև խոսել է իշխանափոխությունից հետո նախատեսվող քայլերի մասին։ Նրա խոսքով՝ պետք է լինի «խաղաղ աշխատանք և կայուն երկիր»։
«Երկրի ղեկավարները պետք է ամեն օր միայն գործով զբաղվեն, մի օր շուտ վերացնեն աղքատությունը։ Մեր երկրի շրջաններում այսօր 500 000 մարդ գործ չունի։ Տարիներով գտել ենք աղքատության մեջ մեղավորների և պայքարել ենք այդ մեղավորների դեմ։ Բայց պետք է ոչ թե մեղավորների դեմ պայքարենք, այլ աղքատության»,- նշել է նա։
Կարապետյանն ընդգծել է, որ Հայաստանի բոլոր մարզերն ու շրջանները պետք է ունենան զարգացման ծրագրեր, իսկ Երևանը՝ 10-ամյա զարգացման ծրագիր։ Նրա խոսքով՝ այսօր ապրում ենք ֆեյսբուքյան գրառումից գրառում։
Նա խոստացել է իշխանափոխությունից հետո «Քաղաքացիական պայմանագիր» կուսակցությանը տալ ճանապարհաշինարարության պաշտոնը։
«Իրենց մոտ երկու բան է ստացվում՝ ասֆալտ անել և ասֆալտին փռել։ Ինձ թվում է՝ գոհ կլինեն, քանի որ դրանից հետո իրենց կյանքում բան չի փոխվի։ Հիմա էլ դրանով են զբաղված»,- հավելել է Կարապետյանը։
Մանրամասները՝ տեսանյութում։
