ՀՀ վարչապետ Նիկոլ Փաշինյանը շարունակել է քննադատել Հայ առաքելական եկեղեցուն՝ նրա ղեկավարությանն անվանելով «պոռնկաբարո»։
Ավելի վաղ «Տաշիր» ընկերությունների խմբի և Հայ գործարարների ասոցիացիայի նախագահ Սամվել Կարապետյանը մեկնաբանել էր Հայ Առաքելական եկեղեցու դեմ Հայաստանի իշխանությունների հայտարարությունները և հույս էր հայտնել, որ իրավիճակի հանգուցալուծմանը մասնակից կլինեն այն քաղաքական գործիչները, որոնց համար տեղի ունեցողն անընդունելի է։
Փաշինյանը նաև սպառնացել է «ընդմիշտ պասիվացնել եկեղեցու ղեկավարությանը պաշտպանող ակտիվացած բարեգործներին», սակայն չի պարզաբանել, թե կոնկրետ ում մասին է խոսքը։
ՀՀ խորհրդարանի նախագահ Ալեն Սիմոնյանը հրաժարվել է մեկնաբանել «Տաշիր» ընկերությունների խմբի ղեկավարի խոսքերը։ Նա չի համաձայնել կարծիքի հետ, որ հայկական իշխանությունները եկեղեցու դեմ արշավ են վարում։
«Չեմ ուզում մեկնաբանել պարոն Կարապետյանի խոսքերը, քանի որ դրանք անտեղի են»,- նշել է Սիմոնյանը։
Փաշինյանն ավելի ուշ արված իր գրառմամբ հայտնել է, որ այսուհետ կօգտագործի միայն «Կանոնագիրք Հայոց»-ի բառապաշարը։ Դա Հայ Առաքելական եկեղեցու վարքագծի կանոնագիրքն է։
Մայիսի 29-ին վարչապետ Փաշինյանը սոցիալական ցանցերում մի շարք քննադատող գրառումներ էր հրապարակել Հայ Առաքելական եկեղեցու ներկայացուցիչների դեմ, իսկ ավելի ուշ կոչ արել ընտրել նոր կաթողիկոս։
Հունիսի 2-ին Փաշինյանը կասկածի տակ էր դրել այն փաստը, որ Գարեգին Բ-ն պահպանել է կուսակրոնության երդումը։ Այնուհետև Փաշինյանը հայտարարել էր կաթողիկոսին փոխելու համար համակարգող խումբ ստեղծելու մասին։ Կարապետյանը, ինչպես նաև Ռուսաստանում գործող 10-ից ավելի հայկական կազմակերպություն հանդես էր եկել հակաեկեղեցական արշավի դեմ։ «Հայաքվե» նախաձեռնությունն առաջարկել էր ստեղծել համազգային հասարակական մարմին՝ եկեղեցին պաշտպանելու համար։
