Բանակի ղեկավարությունը հետաքննություն է սկսել` հասկանալու, թե ՀՀ ԶՈւ զորամասերից որոնցո՞ւմ են «Քաղացիական պայմանագրի» օգտին քիչ ձայներ գրանցվել, գրել է «Հրապարակ» օրաթերթը՝ հղում անելով իր աղբյուրներին։
Թերթը տեղեկացրել է, որ Ստեփանավանում «Բարգավաճ Հայաստան» կուսակցության անդամ հանդիսացող կնոջ 2 զավակի, որոնք կադրային զինվորականներ են, ՀՀ պաշտպանության նախարար Սուրեն Պապիկյանի հրամանով զորացրել են բանակից։ Թերթի ձևակերպմամբ՝ «Պապիկյանի այդ հրամանն ապօրինի է»։
Զինված ուժերին քաղաքական գործընթացներին ներգրավվելու մասին մամուլը գրել էր նաև ընտրություններից առաջ։ «Հրապարակ» օրաթերթը հունիսի սկզբին հայտնել էր, որ ԶՈւ-ում ոչ իշխանական քաղաքական հայացքների համար ավելի քան 200 զինվորական է ազատվել աշխատանքից։ Ավելի ուշ թերթը գրել էր նաև, որ ՊՆ աշխատակիցներին հրահանգվել է սոցիալական ցանցերում «լայքել» և տարածել Պապիկյանի այն գրառումները, որոնք առնչվում են «Ուժեղ Հայաստան» դաշինքի առաջնորդ Սամվել Կարապետյանին և նրա հարազատներին։
