Հայ-ռուսական հարաբերություններում ճգնաժամի մասին խոսակցություններն արհեստական են, խորհրդարանական ընտրություններում քվեարկելուց հետո լրագրողներին հայտարարել է ՀՀ վարչապետ Նիկոլ Փաշինյանը։
«Ես լարվածություն չեմ տեսնում։ Ռուսաստանի հետ մեր հարաբերություններն ունեն ինստիտուցիոնալ բնույթ և հիմնված են փոխադարձ հարգանքի վրա։ Հայաստանում գործող որոշ ուժեր փորձում են նման լարվածություն ստեղծել, սակայն այն չի առաջանում»,- ասել է Փաշինյանը։
Մեկնաբանելով Հայաստանից մի շարք ապրանքների մատակարարումների նկատմամբ Ռուսաստանի սահմանած սահմանափակումները՝ վարչապետը իրավիճակն աշխատանքային և ԵԱՏՄ-ի համար բնորոշ է անվանել։
Նրա խոսքով՝ նման հարցեր պարբերաբար առաջանում են միության անդամ պետությունների միջև և քննարկվում տարբեր մակարդակներում։
«ԵԱՏՄ բոլոր երկրները շահագրգռված են, որպեսզի երրորդ երկրներից ապրանքները չհայտնվեն միության շուկայում՝ շրջանցելով գործող կանոնները»,- պարզաբանել է կառավարության ղեկավարը։
Պատասխանելով ընտրություններում հաղթելու դեպքում Ռուսաստան նախատեսվող այցի մասին հարցին՝ Փաշինյանը հերքել է Երևան-Մոսկվա հարաբերություններում լարվածության առկայության մասին պնդումները։
«Այստեղ այցերի հերթականության հարց չկա։ Ես կմեկնեմ Մոսկվա, ինչպես նաև կմեկնեմ Վաշինգտոն, Բրյուսել, Փարիզ և Թբիլիսի։ Ես նաև ասել եմ, որ հույս ունեմ՝ հնարավորություն կունենամ մասնակցելու Բաքվում կայանալիք Եվրոպական քաղաքական համայնքի գագաթնաժողովին։ Մենք մտադիր ենք բազմակողմանիորեն զարգացնել մեր միջազգային հարաբերությունները»,- հայտարարել է նա։
Մոսկվայից հնչող քննադատության ֆոնին ՌԴ-ն սահմանափակել էր ՀՀ-ից մի շարք ապրանքների ներմուծումը, որոնց թվում են ծաղիկները, «Ջերմուկ» հանքային ջուրը, ալկոհոլային արտադրանքի առանձին խմբաքանակներ, մրգերի և բանջարեղենի որոշ տեակներ։
Վարչապետ Նիկոլ Փաշինյանը հայտարարել էր, որ կառավարությունը կսուբսիդավորի Ռուսաստանի սահմանափակումների պատճառով տուժած բիզնեսին։
