«Ուժեղ Հայաստան» կուսակցության քաղաքական խորհրդի անդամ Նարեկ Կարապետյանը կոչ է արել ՀՀ քաղաքացիներին չհավատալ այն կեղծ տեղեկություններին, որոնք «Քաղաքացիական պայմանագիր» կուսակցությունը տարածում է իրենց քաղաքական ուժի դեմ:
Կարապետյանը «ֆեյք» է որակել սոցիալական ցանցերում և կոնտեքստային գովազդների միջոցով տարածվող տեղեկությունները, թե իբր կուսակցության առաջնորդ Սամվել Կարապետյանը կոչ է արել աջակցել Ռուսաստանին Ուկրաինայի դեմ պատերազմում կամ մտադիր է իր ձայները տալ «Հայաստան» դաշինքի վարչապետի թեկնածու Ռոբերտ Քոչարյանին:
Մեկնաբանելով իշխանությունների այն թեզը, թե Կարապետյանի գլխավորած ուժը մտադիր է իր ձայները տալ Քոչարյանին՝ Կարապետյանը հիշեցրել է, որ նախկին նախագահի և գործարար Գագիկ Ծառուկյանի գլխավորած ընդդիմադիր ուժերը համաձայնել են իրենց ձայները տալ այն ընդդիմադիր թեկնածուին, ով ձայների հաշվարկի արդյունքում կզբաղեցնի առաջին տեղը: Միաժամանակ, ըստ հանրային կարծիքի բոլոր հարցումների, այդ առաջատարն այսօր Սամվել Կարապետյանն է:
«Անգամ ընդդիմադիր առաջնորդներն են հայտարարել, որ իրենց ձայները տալու են ընդդիմության առաջին՝ ամենաշատ ձայն հավաքած ուժին, այսինքն՝ Սամվել Կարապետյանին: Մենք ոչ մի դեպքում մեր ձայնը բացի Սամվել Կարապետյանից ուրիշ քաղաքական ուժի չենք տալու, որովհետև ունենք պրինցիպիալ դիրք, որ Հայաստանի խնդիրների պատճառն այն է, որ չունենք ղեկավար, ով տնտեսագետ է, ով կարող է աղքատությունից հանել մեր երկիրը»,- նշել է նա։
Կարապետյանն անընդունելի է համարել նմանատիպ կեղծ լուրերի տարածումը բյուջետային միջոցների հաշվին ֆինանսավորվող Հանրային հեռուստատեսության եթերով:
«Իրենք անգամ չեն խորշում օգտագործել պետության կողմից ֆինանսավորվող Հանրային հեռուստատեսությունը»,- շեշտել է Կարապետյանը։
Անդրադառնալով սոցիալական ցանցերի խմբերում տարածվող այն տեղեկատվությանը, թե իբր Սամվել Կարապետյանը կոչ է արել աջակցել Ռուսաստանին Ուկրաինայի դեմ պատերազմում՝ Նարեկ Կարապետյանը հայտարարել է, որ գործող իշխանություններն այնպիսի վիճակի են հասցրել երկիրը, որ Հայաստանն այսօր ունի բազմաթիվ սեփական չլուծված խնդիրներ և այլ պետությունների հարցերով զբաղվելու կարիք չունի: Նա ընդգծել է, որ նման լուրերը բացառապես իշխող ուժի կողմից հորինված մանիպուլյացիաներ են:
«Սամվել Կարապետյանն այսպիսի բան չի ասել, սա ՔՊ-ի սուտն է: Պատկերացրեք՝ ասում են Ուկրաինայի պատերազմում... Հայաստանը դեռ իր հարցերը չի լուծել, այնպիսի վիճակի են ՀՀ-ն բերել, որ այնքան հարց ունենք լուծելու, որ հաստատ ուրիշ երկրի հարցերով զբաղվելու կարիք չկա»,- նշել է նա:
Եզրափակելով՝ Կարապետյանը կոչ է արել քաղաքացիներին չտրվել վախի մթնոլորտին և չհավատալ իշխանական քարոզչամեքենայի տարածած ապատեղեկատվությանը։ Նա ընդգծել է, որ միայն Սամվել Կարապետյանի առաջնորդությամբ է հնարավոր երկիրը դուրս բերել պարտությունների և պատերազմների շղթայից ու հաստատել իրական զարգացում։
Հայաստանում խորհրդարանական ընտրությունները կկայանան հունիսի 7-ին, որոնց կմասնակցեն 19 կուսակցություններ և դաշինքներ։ Նախընտրական քարոզարշավը կմեկնարկի մայիսի 8-ին և կավարտվի հունիսի 5-ի կեսգիշերին։
