ՀՀ քննչական կոմիտեն չի հաստատել Մայր Աթոռի դիվանապետ Արշակ արքեպիսկոպոս Խաչատրյանին վերագրվող տեսագրության իսկությունը, հայտարարել է նրա փաստաբան Արսեն Բաբայանը։
Նրա խոսքով՝ ո՛չ հարցաքննության ընթացքում, ո՛չ էլ դրանից հետո արքեպիսկոպոսին կամ նրա փաստաբանին չեն տրամադրվել փորձաքննություն նշանակելու որոշում կամ փորձաքննության եզրակացություն։ Ըստ փաստաբանի՝ դա «ողջամտորեն ձևավորում է հիմնավոր համոզմունք, որ նման փորձաքննություն ո՛չ նշանակվել է, ո՛չ էլ իրականացվել»։
«Ակնհայտ է, որ եթե նույնիսկ նման փորձաքննության եզրակացություն գոյություն ունենար, այն չէր կարող տրամադրվել որևէ այլ անձի, այդ թվում՝ հիշատակվող եպիսկոպոսներին՝ նախաքննության գաղտնիության պահանջների պատճառով»,- ընդգծել է Բաբայանը։
Ավելի վաղ վարչապետի աշխատակազմի ղեկավար Արայիկ Հարությունյանը հրապարակել էր եպիսկոպոսների հայտարարության լուսանկարը, որում նշվում էր, որ ՔԿ քննությունը հաստատել էր Խաչատրյանին վերագրվող տեսանյութի իսկությունը: Փաստաթղթում գրված էր, որ արդյունքները ներկայացվել էին Գարեգին Բ կաթողիկոսին, որն «անտեսել» էր դրանք:
Եպիսկոպոսները կոչ էին արել «մաքրել եկեղեցին սրբապիղծ հոգևորականից» և «խստագույնս դատապարտել» կաթողիկոսի դիրքորոշումը: Հայտարարությունն ստորագրել էր 13 հոգևորականից 9-ը, այդ թվում՝ Հովնան Տերտերյանը, Նավասարդ Կճոյանը, Առաքել Քարամյանը, Սիոն Ադամյանը, Վազգեն Միրզախանյանը, Անուշավան Ժամկոչյանը, Վրթանես Աբրահամյանը, Արտակ Տիգրանյանը և Գևորգ Սարոյանը։
Արքեպիսկոպոս Խաչատրյանը հրաժարվել է լրագրողներին մեկնաբանություն տալ փորձաքննության իսկության մասին հաղորդագրությունների վերաբերյալ։ Նա նշել է, որ ստորագրողները պետք է հաստատեն փաստաթղթի իսկությունը, որից հետո կհրապարակի պարզաբանում։
Խաչատրյանը հավելել է, որ տեղյակ չէ փորձաքննության մասին և ծանոթ չէ դրա եզրակացություններին՝ մեջբերելով իր փաստաբանի մանրամասն մեկնաբանությունը։
Մայր Աթոռի տեղեկատվական համակարգի պատասխանատու Տեր Եսայի քահանա Արթենյանն «Ազատության» հետ հարցազրույցում հոգևորականներին վերագրվող հայտարարությունը «խեղաթյուրումներով շարադրված տեքստ» է անվանել։
«Մի շարք տեղեկություններ և պնդումներ չեն համապատասխանում իրականությանը։ Այս առնչությամբ անհրաժեշտ քննարկումներից հետո լուսաբանություններ կտրվեն»,- ասել է Արթենյանը:
