Դատարանը փետրվարի 18-ի նիստում 10 մլն դրամ գրավի դիմաց ՀՀ ԶՈւ գլխավոր շտաբի պետի նախկին տեղակալ, ՀՀ ազգային հերոս, գեներալ-լեյտենանտ Տիրան Խաչատրյանին ազատ արձակելու վճիռ կայացրեց։
Պաշտպանական կողմը դատական նիստը հետաձգելու միջնորդություն ներկայացրեց, հաջորդ դատական նիստը նշանակվեց մարտի 14-ին՝ ժամը 14։40-ին։
Հունվարի 4-ին Խաչատրյանի պաշտպանները հայտնել էին նրա ձերբակալման մասին։ Նրանք տեղեկացրել էին, որ Խաչատրյանը չի ընդունում իրեն առաջադրված մեղադրանքը։ Հունվարի 5-ին փաստաբանները տեղեկացրել էին, որ Խաչատրյանը 2 ամսով կալանավորվել է։ Նույն օրը Քննչական կոմիտեն հայտնել էր, որ Խաչատրյանի անփույթ վերաբերմունքը 44-օրյա պատերազմի ընթացքում ծանր հետևանքներ էր առաջացրել, այդ թվում՝ հակառակորդը առանց խոչընդոտի տիրացել էր ռազմավարական բարձունքի:
Խաչատրյանին կալանավորել էին 2024-ի հունվարի 15-ին՝ Կոտայքի մարզի ռեստորաններից մեկում տեղի ունեցած միջադեպին մասնակցելու կասկածանքով։ Դեպքի առթիվ քրվարույթ էր հարուցվել Քրեական օրենսգրքի խուլիգանության, ապօրինի կերպով հրազեն կրելու և զենքի գործադրմամբ առողջությանը միջին ծանրության վնաս պատճառելու հոդվածների հատկանիշներով։ 2024-ի մարտի 4-ին դատարանը Խաչատրյանի կալանքը փոխարինել էր երկրից չհեռանալու մասին արգելքով։ Նրա նկատմամբ կիրառվել էր 5 մլն դրամ գրավ։
Խաչատրյանը պաշտոնանկ էր արվել 2020 թվականի հունիսի 15-ին։ 2021 թվականի մարտի 24-ին պաշտոնը վերականգնելու պահանջով նա հայց էր ներկայացրել այն ժամանակ ՀՀ պաշտպանության նախարարի պաշտոնն զբաղեցնող Վաղարշակ Հարությունյանի դեմ։ Վարչական դատարանը, սակայն, մերժել էր հայցը։
