Քննչական կոմիտե հրավիրված 7 անձի նկատմամբ որպես խափանման միջոց ընտրվել է բացակայելու արգելքը, Armenia Today-ին հայտնել են ՔԿ-ից:
Խափանման միջոցը կիրառվել է արքեպիսկոպոսներ Նաթան Հովհաննիսյանի և Հայկազուն Նաջարյանի, ինչպես նաև եպիսկոպոսներ Հովնան Հակոբյանի, Մակար Հակոբյանի, Վահան Հովհաննիսյանի և Մուշեղ Բաբայանի նկատմամբ։
ՔԿ-ից մանրամասնել են, որ նրանց նկատմամբ հանրային քրեական հետապնդում է հարուցվել դատական ակտը չկատարելու դեպքի առթիվ նախաձեռնված քրեական վարույթի նախաքննության ընթացքում։
Վարույթը հարուցվել է Քրեական օրենսգրքի 507-րդ հոդվածի 2-րդ մասով (դատական ակտը չկատարելը կամ դրա կատարմանը խոչընդոտելը, որը կատարվել է իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով, առավելագույն պատիժը՝ 2 տարվա ազատազրկում):
Եպիսկոպոսները ՔԿ էին հրավիրվել՝ կապված հունվարի 29-ին Հայ Առաքելական եկեղեցու կողմից Մասյացոտնի թեմի կարգալույծ նախկին առաջնորդի վերաբերյալ դատարանի որոշումը չկատարելու հետ։ Փաստաբան Ռուբեն Մելիքյանի խոսքով՝ գործի նպատակն է խոչընդոտել Եպիսկոպոսաց ժողովի գումարումը՝ մասնակիցների նկատմամբ բացակայելու արգելք սահմանելով։
Հունվարի 13-ին Մայր Աթոռ Սուրբ Էջմիածնում տեղի ունեցած Գերագույն հոգևոր խորհրդի ժողովի ժամանակ որոշվել էր Եպիսկոպոսաց ժողովն անցկացնել փետրվարի 16-19-ը՝ Ավստրիայում։ Ավելի ուշ՝ հունվարի 21-ին, ՀՀ վարչապետ Նիկոլ Փաշինյանին աջակցող եպիսկոպոսները կոչ էին արել չեղարկել ժողովը՝ նշելով, որ Ավստրիայում դրա անցկացումը «երկպառակտություն է սերմանում» և «վարկաբեկում» է եկեղեցուն։
