Ֆինանսների նախարար Վահե Հովհաննիսյանը հունվարի 19-ին հարցաքննվել է իրեն առնչվող քրեական գործի շրջանակում, այդ մասին նախարարը հայտնել է 2025 թվականի իր ամփոփիչ ասուլիսին, որը հեռարձակվել է Armenia Today-ի Youtube-ի ալիքով։
Նա տեղեկացրել է, որ վկայի կարգավիճակ ունի, այլ մանրամասներ չի հայտնել։
2025 թվականի դեկտեմբերին ԶԼՄ-ները գրել էին, որ Հակակոռուպցիոն կոմիտեն դատարանի պահանջով քրեական վարույթ է հարուցել Ֆինանսների նախարարի ենթադրյալ կոռուպցիոն գործարքների կապակցությամբ։
Վարույթը նախաձեռնվել էր, ըստ էության, դեռևս 2024-ի դեկտեմբերի 4-ին ՀՀ փաստաբանների պալատի փաստաբանների ակումբի՝ նախարարի վերաբերյալ հանցագործության մասին հաղորդման հիմքով։
Ըստ նախաձեռնող խմբի՝ նախարարը «կոռուպցիոն ռիսկեր պարունակող գործողություններ է կատարել»։ Նրանք հանգամանքներ էին հրապարակել, որոնցից մեկը Հովհաննիսյանի՝ 2021 թվականին արված հայտարարությունն է, ըստ որի՝ նա 1 000 000 դոլար անտոկոս փոխառություն է ստացել։
Ըստ հաղորդման՝ «Հովհաննիսյանը 1 050 000 դոլարով գնել է «Կարիտաս Իտալիանա» ՓԲ ընկերության 100% բաժնետոմսերը, իսկ հետագայում այդ կազմակերպությունը վերակազմավորել է «ՋԻ Կոդեր» ՍՊ ընկերության, իր բաժնեմասերը վաճառել է ազգականին»։
Նշվում էր, որ «2022-ին «Ջի Կոդեր» ՍՊԸ-ին ՀՀ կառավարությունը տրամադրել է 1,8 մլրդ դրամի ապրանքների ներմուծման մաքսատուրքի արտոնություն, որի ազատված մաքսատուրքը կազմել է 118 մլն դրամ»։ Փաստաբանների ակումբի տվյալներով՝ 2023-ի դրությամբ Հովհաննիսյանը «Ջի Կոդեր» ՍՊԸ-ի նկատմամբ ունեցել է 52 614 000 դրամի փոխառության պահանջի իրավունք։
