Հայաստանում, ըստ քաղաքացիական կացության ակտերի ռեգիստրի, 2024 թվականի հունվար-դեկտեմբերին գրանցվել է 15 324 ամուսնություն, որը 2023-ի համեմատ նվազել է 1006-ով: 2023 թվականին Հայաստանում 16 330 ամուսնություն էր գրանցվել։
Միևնույն ժամանակ՝ Armstat.am կայքում հրապարակված տվյալների համաձայն, ամուսնալուծությունների թիվը 2024 թվականին 2023 թվականի 4525-ի համեմատ ավելացել է 164-ով` կազմելով 4689, արձանագրվել է ամուսնալուծության 306 դեպք` 2023թ. հունվար-դեկտեմբերին արձանագրված 277-ի համեմատ:
Armenia Today-ը հարցում է անցկացրել Երևանում՝ հետաքրքրվելով քաղաքացիներից, թե ի՞նչն է օգնում պահպանել ամուր ամուսնությունը, չհասնել ամուսնալուծության։ Քաղաքացիներին նաև հարցրել ենք, թե ինչպե՞ս են վերաբերվում ամուսնալուծություններին։
Հարցվածների մեծ մասը բացասաբար է արտահայտվել ամուսնալուծության մասին։ Ընտանիքների փլուզման հիմնական պատճառ նշել են սոցիալական պայմաններն ու ֆինանսական դժվարությունները: Գրեթե բոլոր հարցվածները համակարծիք էին, որ ընտանեկան երջանկության գրավականը փոխադարձ հարգանքի, վստահության և զիջումների մեջ է:
Հարցմանը մասնակցած տարեց տղամարդու կարծիքով՝ ամուսնալուծությունները «մոդա» են դարձել։
«Ամուսնալուծությունը սոցիալական խնդիր չէ, պարզապես մարդիկ, երևի, չեն ուզում երեխաներով զբաղվել։ Հիմա մոդա է ամուսնալուծվելը»,- ասել է տղամարդը։
Հարցման մեկ այլ մասնակցի համար ամուսնալուծությունը ցավալի փաստ է։
«Ծայրահեղ տարակուսանք է առաջացնում, քանի որ մեր շրջապատում շատ ամուսնալուծվածներ կան, բայց ես չեմ կարողանում հասկանալ։ Կարծում եմ՝ համատեղ չլինելու մեջ է խնդիրը: Չեմ կարծում, որ կենցաղային խնդիրները կարող են քայքայել ընտանիքը, քանի որ եթե սիրում ես, կենցաղին էլ ես հարմարվում»,- նշել է կինը։
Մեկ այլ քաղաքացու խոսքով՝ ամուսնալուծությունները հետևանք են նրա, որ ժամանակակից կանայք ամուսնանում են բացառապես երեխա ունենալու նպատակով:
«Ամուսնանում են, աղջկան պետք է երեխա ունենալ, ունենում է, որից հետո նրան ամուսին պետք չէ՝ շպրտում է դուրս»,- կարծիք է հայտնել տղամարդը:
Քաղաքացիներից մեկի կարծիքով՝ օրենքներում պետք է փոփոխություններ կատարել, որոնք կխստացնեն տղամարդկամց պատասխանատվությունն ամուսնալուծությունից հետո:
«Պետք է ընդամենը փոխել օրենքները։ Եթե տղամարդիկ ամուսնալուծության դեպքում լուրջ պատասխանատվության ենթարկվեն, կարծում եմ, նման բան շատ չի լինի։ Տղամարդիկ պետք է կազմակերպված լինեն, կնոջ հետ գան ընդհանուր հայտարարի, ոչ թե հայտարարեն, որ չի ստացվում և վերջ։ Տղամարդիկ պետք է ձիգ լինեն, կանայք՝ խելացի»,- հավելել է նա։
Հարցվածներից մեկը հայտարարել է, որ ամուսնալուծությունները մարդկանց անձնական գործն են։
«Չի կարելի դա վատ կամ լավ գնահատել։ Բայց երբ վերլուծում ես իրավիճակը, հասկանում ես, որ հիմնական պատճառը սոցիալական վիճակն է»,- կարծում է հարցվածը։
Հարցման մեկ այլ մասնակից նույնպես առանձնացրեց սոցիալական խնդիրները։ Նրա կարծիքով՝ երջանկության գրավականը միմյանց հանդեպ սերն ու հարգանքն է։
«Երևի բարդությունները ֆինանսական են, և այդ բեռը զույգերը չեն կարողանում տանել։ Պետք է սիրել ու հարգել միմյանց, դա երջանկության գրավականն է»,- նշել է կինը։
Մեկ այլ հարցված կարծում է, որ ամուսնալուծությունների թիվն աճել է այն պատճառով, որ «երիտասարդությունը փչացել է»։
«Տղամարդիկ փչացել են, ի վիճակի չեն ամուսնանալ և կնոջ հետ ապրել, հիմա տղեն տղու հետ է ապրում»,- ընդգծել է հարցման մասնակիցը։
Քաղաքացիներից մեկի խոսքով էլ՝ չակերտավոր հոգեբաններն են մեղավոր, որոնք մոլորեցնում են ժողովրդին և դրանով անուղղակիորեն ամուսնալուծությունների աճի պատճառ դառնում:
«Կյանքի միտումները շատ են փոխվել, սոցիալական ցանցերը, չակերտավոր հոգեբանները մարդկանց հավաստիացնում են, որ իրենք երջանիկ դառնալու համար պետք է եսակենտրոն լինեն։ Փոխադարձ հարգանքը երջանկության գրավականն է»,- ընդգծել է նա։
Մանրամասները՝ տեսանյութում։
