Եկամուտների հայտարարագրման դեպքում հայտարարատու ֆիզիկական անձինք կարող են փոխհատուցում ստանալ, հայտնել են ՀՀ ֆինանսների նախարարությունից՝ պարզաբանելով, թե որ դեպքերում է հնարավոր օգտվել առավելություններից։
«Եթե տարվա ընթացքում Հայաստանի Հանրապետության քաղաքացիներն առողջապահության կամ կրթության գծով կատարել են որոշակի սոցիալական ծախսեր, ապա նրանք՝ անձնական եկամուտները հայտարարագրելու պարագայում, հնարավորություն են ունենում ստանալու փոխհատուցում իրենց կողմից կատարված ծախսերի դիմաց»,- հստակեցրել են նախարարությունից։
Մասնավորապես, առողջապահության ապահովագրության փաթեթի գծով սոցիալական ծախսի համար տարեկան փոխհատուցման առավելագույն չափը 50 000 դրամ է, իսկ կրթության գծով՝ 100 000 դրամ:
«Ընդ որում՝ սոցիալական ծախսերի այս համակարգից հնարավորություն ունեն օգտվել ոչ միայն հայտարարատու ֆիզիկական անձինք, այլև վերջիններիս ընտանիքի անդամները: Քաղաքացիների և նրանց ընտանիքի անդամների համար նշված ուղղություններով կատարված սոցիալական ծախսերի առավելագույն չափը կազմում է տարեկան 100 000 դրամ»,- հավելել են նախարարությունից։
Հայաստանում 2023 թվականին ներդրվել էր եկամուտների համընդհանուր հայտարարագրման համակարգ։ 2025 թվականին 2024 թվականի հաշվետու տարվա համար եկամուտների հայտարարագիր պետք է ներկայացնեն այն նոր խմբերը, որոնք 2024 թվականի ընթացքում համարվել են վարձու աշխատող, ինչպես նաև 2024-ի ընթացքում քաղաքացիաիրավական պայմանագրերի շրջանակում ստացել են հարկվող եկամուտ։
2024 թվականի համար ֆիզիկական անձինք եկամուտների հայտարարագիր պետք է ներկայացնեն էլեկտրոնային եղանակով։ Նախքան հայտարարագիր ներկայացնելն, առաջին հերթին, պարտադիր է իրականացնել անձի նույնականացում և ձեռք բերել էլեկտրոնային ստորագրություն: Անձի նույնականացման համար անհրաժեշտ է ունենալ նույնականացման ID քարտ։
Հանրային հեռուստաընկերության եթերում ՊԵԿ նախագահ Էդուարդ Հակոբյանը, անդրադառնալով ռեզիդենտ հանդիսացող ՀՀ քաղաքացիներ կողմից մինչև մայիսի 1-ը հայտարարագիր ներկայացնելու օրենսդրական պահանջին, հայտարարել էր, որ մինչև 300 հազար դրամ գործարքները հայտարարագրման ենթակա չեն։
