Գործարարների ասոցիացիայի և «Տաշիր» ընկերությունների խմբի նախագահ Սամվել Կարապետյանը 2025 թվականի Forbes-ի վարկածով Ռուսաստանի առևտրային անշարժ գույքի 30 խոշորագույն սեփականատերերի վարկանիշում զբաղեցրել է երկրորդ տեղը:
Պարբերականի տվյալներով՝ խմբի վարձակալությունից ստացված եկամուտը կազմել է 700 մլն դոլար՝ նախորդ տարվա 685 մլնի փոխարեն։ Տարվա արդյունքներով «Տաշիր» խումբն ամրապնդել է դիրքերը «30 խոշորագույն ռանտյեների» ցանկում (նախկինում՝ «Ռուսական անշարժ գույքի արքաներ»)։ Ընկերությունների խումբը վարկանիշում ընդգրկվում է 2007 թվականից և 2011-ից ի վեր կայունորեն զբաղեցնում է տեղեր լավագույն եռյակում։
Վարկանիշում ընդգրկվել է նաև հայ գործարար և ներդրող Դավիթ Ամարյանի Balchug Capital ընկերությունը, որը զբաղեցրել է 26-րդ տեղը՝ 75 մլն դոլար եկամուտով։ Վարկանիշի առաջատարներն են Զարախ Իլիևը և Գոդ Նիսանովը («Կիևսկայա պլոշչադ» ընկերությունների խումբ)՝ մոտ 1,4 մլրդ դոլար եկամուտով։ Առաջատարների թվում են նաև «Սաֆմար»-ը (Գուցերիևների ընտանիք) և Enka-ն։
Կարապետյանի բիզնեսը ներառում է ավելի քան 100 օբյեկտ՝ հիմնականում առևտրի կենտրոններ և գրասենյակային շենքեր Մոսկվայում և Ռուսաստանի շրջաններում։ «ՌԻՈ» 16 առևտրի կենտրոններից բաղկացած ցանցը ներկայացված է Ռուսաստանի 15 քաղաքում և Երևանում։ 2025 թվականի դեկտեմբերին «Տաշիր»-ը Մոսկվայի «Սելիգերսկայա» մետրոյի կայարանի հարևանությամբ բացել է Avenue Sever առևտրի կենտրոնը (135 հազար քմ)։
Գործարարը կալանավորվել էր 2025 թվականի հունիսին՝ Հայաստանի իշխանությունների՝ Հայ Առաքելական եկեղեցու դեմ արշավի քննադատությունից հետո։ Ավելի քան վեց ամիս կալանքի տակ գտնվելուց հետո նա տեղափոխվել էր տնային կալանքի և նախորդ տարվա դեկտեմբերի 30-ին ազատ արձակվել գրավի դիմաց։
Ձերբակալությունից հետո Կարապետյանը հայտարարել էր «Մեր ձևով» շարժման ստեղծման մասին, որը 2026 թվականի փետրվարին հայտնել էր «Ուժեղ Հայաստան» կուսակցության ստեղծման մասին։ Փետրվարի 11-ին Կարապետյանը միաձայն ընտրվել էր կուսակցության նախագահ և առաջադրվել վարչապետի թեկնածու՝ հունիսի 7-ին կայանալիք խորհրդարանական ընտրություններում։
