Հունվարի 1-ից Հայաստանում պարտադիր զինվորական ծառայության ժամկետը կրճատվելու է մինչև 18 ամիս, ԱԺ-ում հայտարարել է ՀՀ պաշտպանության նախարար Սուրեն Պապիկյանը՝ ԱԺ պաշտպանության և անվտանգության մշտական հանձնաժողովի նիստում։
Նա նշել է, որ այս փոփոխությունը կվերաբերի 2026 թվականի հունվարի 1-ից հետո զինվորական ծառայության զորակոչված քաղաքացիներին։ Այդ օրվա դրությամբ ծառայության մեջ գտնվողների համար ժամկետը կմնա նույնը՝ 24 ամիս։
Նախարարն ընդգծել է, որ 2025 թվականի ձմեռային զորակոչի շրջանակներում զինված ուժերում զորակոչը կսկսվի 2026 թվականի հունվարի 7-ին, և այդ ժամանակ զորակոչվածները կծառայեն 18 ամիս։
Կրճատումը նախատեսված է կառավարության 2021-2026 թվականների ծրագրով և ՀՀ բանակի վերափոխման հայեցակարգով, եզրափակել է նա։
ՊՆ-ն սեպտեմբերին օրինագիծ էր առաջարկել, որով նախատեսվում էր պարտադիր զինվորական ծառայության ժամկետը կրճատել մինչև 18 ամիս։ Հոկտեմբերի 21-ին ՀՀ վարչապետ Նիկոլ Փաշինյանը հայտնել էր, որ պարտադիր զինծառայության ժամկետի կրճատման մասին օրինագծի ընդունման դեպքում այն ուժի մեջ կմտնի 2026 թվականի հունվարի 1-ից։
Հոկտեմբերի 25-ին Պապիկյանը խոսել էր սահմանային իրավիճակի, բանակում մահացությունների թվի նվազման, զենքի ձեռքբերման, ինչպես նաև զորակոչի կրճատման ծրագրերի մասին։ Նախարարի խոսքով՝ ցանկալի կլինի, որ բանակը գրավիչ լինի հասարակության համար և չընկալվի որպես կալանավայր։
Կարդացեք նաև՝
«Ռիսկային է», և «մարտական հերթափոխի խնդիրը կխորանա»․ Աբրահամյանը՝ ժամկետային զինծառայության կրճատման մասին
