Հունգարիայի վարչապետ Վիկտոր Օրբանը ժամանել է Մոսկվա՝ ՌԴ նախագահ Վլադիմիր Պուտինի հետ բանակցությունների նպատակով, հայտնում է Reuters-ը։
Նրա խոսքով՝ հիմնական թեմաները կլինեն Հունգարիայի նավթի և գազի մատակարարումների ապահովումը ձմռան և հաջորդ տարվա համար, ինչպես նաև Ուկրաինայում խաղաղության նախաձեռնությունների հնարավոր քննարկումները։ Օրբանն ընդգծել է, որ «դժվար կլինի խուսափել» խաղաղության ջանքերի քննարկումներից՝ չնայած շարունակվող լարվածությանը։
Օրբանի հայտարարությունը համընկել է Պուտինի հայտարարությունների հետ, ով հրապարակավ Վաշինգտոնի նախաձեռնություններն անվանել էր բանակցությունների «մեկնարկային կետ»։
Հունգարիան շարունակում է կախված լինել ռուսական էներգետիկայից՝ տարվա սկզբից ներմուծելով 8,5 միլիոն տոննա նավթ և ավելի քան 7 միլիարդ խորանարդ մետր գազ, հաղորդում է Reuters-ը: ԱՄՆ-ն նախկինում Բուդապեշտին ազատել էր պատժամիջոցներից՝ թույլ տալով օգտագործել ռուսական նավթն ու գազը: Միևնույն ժամանակ՝ Հունգարիան և Միացյալ Նահանգները նաև ստորագրել են միջուկային համագործակցության համաձայնագիր, որը ներառում է ամերիկյան վառելիք գնել Պակշ-1 ատոմակայանի համար, որը Ռուսաստանը ընդլայնում է Պակշ-2 նախագծի միջոցով:
Օրբանը նախկինում առաջ էր մղել Բուդապեշտում ԱՄՆ նախագահ Դոնալդ Թրամփի և Պուտինի մասնակցությամբ «խաղաղության գագաթնաժողովի» գաղափարը և շարունակում է պահպանել իր հատուկ դիրքը ԵՄ-ում և ՆԱՏՕ-ում՝ պատերազմի ընթացքում պահպանելով Մոսկվայի հետ դիվանագիտական կապերը։
Վաշինգտոնն առաջարկել էր ուկրաինական կարգավորման 28 կետից բաղկացած ծրագիր, որը նախատեսում է Ռուսաստանի կողմից ուկրաինական որոշակի տարածքների ճանաչում, ուկրաինական բանակի նկատմամբ սահմանափակումներ, մի քանի գոտու ապառազմականացում և Կիևի կողմից օտարերկրյա զորքերի տեղակայումից հրաժարում: Որոշ կետեր վերաբերում են ռուսաց լեզվի պաշտոնական կարգավիճակին և ուկրաինական ուղղափառ եկեղեցուն: Փաստաթուղթը նաև անվտանգության երաշխիքներ է տրամադրում Ուկրաինային:
ԱՄՆ նախագահ Դոնալդ Թրամփը նոյեմբերի 25-ին տեղեկացրել էր, որ հատուկ բանագնաց Սթիվ Ուիտկոֆին բանակցությունների նպատակով կգործուղի Մոսկվա: Ուկրաինայի նախագահ Վլադիմիր Զելենսկին հայտնել էր, որ 28 կետանոց ծրագիրը կրճատվել է, և որոշ դրույթներ հանվել են։
