Վարչապետ Նիկոլ Փաշինյանը նոյեմբերի 2-ին երկրորդ անգամ մասնակցել է Արագածոտնի մարզի Օհանավան գյուղի Հովհաննավանք եկեղեցում նախկին հոգևոր հովիվ, կարգալույծ քահանա Ստեփան Ասատրյանի ծեսին:
Ասատրյանին Ամենայն Հայոց կաթողիկոս Գարեգին Երկրորդը կարգալույծ էր հռչակել հոկտեմբերի 21-ին, սակայն նա հայտարարել էր, որ չի ընդունում Էջմիածնի որոշումը և պատարագի էր հրավիրել, որին առաջին անգամ՝ հոկտեմբերի 26-ին ևս, մասնակցել էր վարչապետը։ Փաշինյանը պնդում է, որ Գարեգին Երկրորդը զավակ ունի, ու այդպիսով խախտել է կուսակրոնության ուխտը: Վարչապետի համոզմամբ՝ «կարգալույծ Կտրիճ Ներսիսյանը (կաթողիկոսը-խմբ․) չի կարող կարգալույծ անել»։
Armenia Today-ը հարցում է անցկացրել Երևանում, թե ինչպե՞ս են քաղաքացիները վերաբերվում Փաշինյանի մասնակցությանը կարգալույծ քահանայի մատուցած արարողությանը, իշխանության քննադատությանը եկեղեցուն, և ինչպիսի՞ն պետք է լինի եկեղեցի-իշխանություն երկխոսությունը։
Հարցվածների մեծամասնությունն ասել է, որ բացասական է վերաբերվում իշխանության՝ եկեղեցու վրա ճնշումներին, և ըստ նրանց՝ ելքը միայն եկեղեցու գործերին չխառնվելն է։
«Իշխանության ոչ մի արարք չեմ ընդունում, յուրաքանչյուր իրեն հարգող քաղաքացի չի կարող նորմալ վերաբերվել այս ամենին»,- ասել է քաղաքացիներից մեկը։
Հարցման մեկ այլ մասնակից էլ նշել է, որ Փաշինյանը նախ ինքն իր քայլերը պետք է վերանայի։
«Ինքն ի՞նչ գործ ունի, որ մտել է եկեղեցի ու եկեղեցականներին բան է ասում, թող ինքն իրեն մաքրի։ Այս ի՞նչ երկիր դարձավ, սա՞ էինք մենք ուզում։ Ինչ լինում է՝ գցում է ուրիշների վրա»,- նշել է քաղաքացին։
Հարցվածներից ոմանք ասել են, որ դրական են վերաբերվում վարչապետի՝ եկեղեցու մասին քննադատություններին և կողմ են, որ Ամենայն Հայոց կաթողիկոսը հեռանա։
«Եթե մի կաթողիկոս բիզնեսների մեջ է, հետևաբար՝ իր կողմից կարգալույծ արած քահանան ավելի հարգելի է»,- ասել է հարցման մասնակիցներից մյուսը։
Կային նաև քաղաքացիներ, որ ցանկություն չունեին մեկնաբանել եկեղեցի-իշխանություն լարվածությունը։
«Դա մեզ չի վերաբերվում, իրենց հարցեր ուղղեք»,- ասել է նրանցից մեկը:
Մանրամասները՝ Armenia Today-ի տեսանյութում։
