Նոյեմբերի 2-ին Հովհաննավանքում մատուցվել է երկրորդ ծեսը՝ կարգալույծ քահանա Ստեփան Ասատրյանի մասնակցությամբ: Armenia Today-ի ուղիղ հեռարձակումը՝ եկեղեցու բակից։
Մինչ մեկնարկը՝ ՀՀ վարչապետ Նիկոլ Փաշինյանը Ֆեյսբուքում տեսաուղերձ էր հրապարակել, որում, մասնավորապես, հայտարարել էր, որ «հոգևոր և բարոյական նորոգման օրակարգը Մայր Աթոռ Սուրբ Էջմիածինը պղծության ճիրաններում պահողներից ազատագրելու ճանապարհն է»։
Արարողությանը, բացի վարչապետից, մասնակցել են նաև ԱԺ նախագահ Ալեն Սիմոնյանը, մի շարք նախարարներ, Հայաստանի մի քանի մարզի ղեկավարներ, ինչպես նաև իշխող «Քաղաքացիական պայմանագիր» կուսակցության պատգամավորներ և իշխանության կողմնակիցներ:
Armenia Today-ի ուղիղ հեռարձակման կադրերից երևում է, որ արարողությանը կրկին մասնակցել է դպիր, որը, ըստ ԶԼՄ-ների, «Քաղաքացիական պայմանագիր» երիտասարդական կազմակերպության անդամ է։ Հոկտեմբերի 26-ին՝ կարգալույծ քահանայի առաջին ծեսի կադրերում, փաստաբան Միհրան Պողոսյանը ֆիքսել էր նրա դաջվածքը։
Արարողության ժամանակ կարգալույծ քահանան հայտարարել է, որ յուրաքանչյուրի համար առաջին տեղում պետք է լինի պետությունն ու պետականությունը, իսկ երկրորդ տեղում՝ եկեղեցին:
«Արցախը պետականություն չուներ, բայց եկեղեցիներ ուներ։ Արցախում պետականության բացակայության պատճառով կորցրել ենք նաև մեր եկեղեցիները»,- նշել է նա։
Արարողությունից հետո ԱԺ նախագահը պնդել է, որ Ամենայն Հայոց կաթողիկոս Գարեգին 2-րդը պետք է հեռանա։ Armenia Today-ի թղթակցի հարցին, թե ինչպե՞ս են հեռացնելու վեհափառին, Սիմոնյանը նշել է, որ նա դեռ ինքնակամ հեռանալու ժամանակ ունի։
«Նա քաղաքական հոտառություն ունի, կարելի է ասել՝ քաղաքական գործիչ է։ Պետք է գիտակցի, որ այս գործընթացը կանգ չի առնելու, քանի այլընտրանք ունի՝ պետք է ինքնուրույն հեռանա։ Պետք է դանակը ոսկորին հասնի, նո՞ր հասկանա, որ ինքնակամ պետք է հեռանա»,- նշել է Սիմոնյանը։
ԱԺ նախագահն ընդգծել է, որ Հայ Առաքելական եկեղեցու բարձրաստիճան հոգևորականների փոփոխությունը պետք է տեղի ունենա մինչև 2026 թվականի խորհրդարանական ընտրությունները: Միևնույն ժամանակ՝ նա նշել է, որ այդ հարցը պետք չէ քաղաքականացնել։
Կարգալույծ քահանայի առաջին ծեսին նախորդել էր հոգևորականների ձերբակալությունների երկրորդ ալիքն Ասատրյանի՝ եկեղեցու ներսում առկա խնդիրների, այնուհետ «ընդդիմության 2021-ի ցույցերին ստիպողաբար մասնակցելու» հայտարարությունից հետո, որի վերաբերյալ քրեական վարույթ էր նախաձեռնվել։ Փաշինյանը հայտարարել էր, որ պատրաստ է կանգնել Ասատրյանի և եկեղեցու խնդիրները վեր հանող հոգևորականների թիկունքին։
Հոկտեմբերի 15-ին Ասատրյանի՝ «ցույցերին ստիպողաբար մասնակցելու» հայտարարության քրվարույթի շրջանակում Արագածոտնի թեմի առաջնորդարանում և հոգևորականների տան խուզարկություններից հետո կալանավորվել էին թեմի առաջնորդ Մկրտիչ եպիսկոպոս Պռոշյանը և Մուղնիի Սուրբ Գևորգ եկեղեցու հոգևոր հովիվ Գարեգին քահանա Արսենյանը, թեմի հաշվապահի նկատմամբ տնային կալանք էր կիրառվել։ Ասատրյանը հոկտեմբերի 21-ին կարգալույծ էր հռչակվել, բայց հրաժարվել էր ընդունել կարգավիճակը:
Փաշինյանը հոկտեմբերի 26-ի ծեսից հետո հայտարարել էր, որ նոյեմբերի 2-ին նույնպես կլինի Հովհաննավանքում՝ մասնակցելու կարգալույծ քահանայի արարողությանը։ ԶԼՄ-ները գրել էին, որ Ասատրյանը փոխել է եկեղեցու փականը՝ խոչընդոտելով հոգևորականների մուտքը։
Կարդացեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
