Wizz Air ավիաընկերությունը դադարեցնում է Վիեննա թռիչքները և առաջարկում նոր ուղղություններ՝ բազավորվելով Հայաստանում, հայտարարել է Wizz Air Hungary ավիաընկերության գործադիր տնօրեն Ռոլանդ Թիշները:
«Փակում ենք Վիեննայի մեր բազան։ Երբ սկսեցինք այնտեղ մեր գործունեությունը, այլ հույսեր ունեինք: Սակայն օդանավակայանի ծախսերը և հարկերն զգալիորեն աճեցին՝ բառացիորեն կրկնապատկվեցին այս տարիների ընթացքում, ինչը չի համապատասխանում մեր գործունեության մոդելին»,- նշել է նա՝ «Արմենպրեսի» հարցին ի պատասխան:
Գործադիր տնօրենը շեշտել է, որ դա կիրականացվի երկու փուլով․ առաջին փուլը տեղի է ունենում հիմա, իսկ հաջորդը՝ 2026-ի մարտին։
«Դրանով Վիեննայի չվերթը կչեղարկվի։ Ամեն դեպքում՝ դեռ մի քանի ամիս կա, կտեսնենք, թե արդյոք հնարավոր կլինի՞ և ինչպե՞ս կարող ենք փոխարինել այդ չվերթը»,- եզրափակել է նա:
«Զվարթնոց» միջազգային օդանավակայանում այսօր տեղի ունեցած Wizz Air ավիաընկերության բազայի բացման պաշտոնական արարողությանն էլ նշվել է, որ այսօրվանից սկսած՝ ավիաընկերությունն առաջարկում է 8 նոր ուղղություն դեպի Եվրոպա՝ Պրահա (մեկնարկել է), Համբուրգ (մեկնարկել է), Նեապոլ (մեկնարկել է), Փարիզ Բովե (հոկտեմբերի 2-ից), Պաֆոս (հոկտեմբերի 2-ից), Բարի (հոկտեմբերի 26-ից), Բուխարեստ (հոկտեմբերի 26-ից), Մեմինգեն (հոկտեմբերի 28-ից):
Ընդհանուր առմամբ՝ Wizz Air-ը Երևանից կիրականացնի չվերթեր 16 ուղղություններով՝ դեպի 9 երկիր:
«Օդանավակայանում կբազավորվեն երկու ժամանակակից Airbus A321neo ինքնաթիռներ, որոնք նախորդ սերնդի ինքնաթիռների համեմատ ապահովում են վառելիքի սպառման և CO₂ արտանետումների 20%-ով կրճատում, ինչպես նաև՝ աղմուկի 50%-ով նվազեցում»,- ասվում է հաղորդագրությունում:
Ավելի վաղ Wizz Air-ը գործարկել էր Լառնակա-Գյումրի-Լառնակա երթուղով չվերթեր։
