Հայկական կողմը վերահաստատել է, որ Սյունիքով անցնող ճանապարհին, որն ապաշրջափակվելու է «Միջազգային խաղաղության և բարգավաճման համար Թրամփի երթուղի» (TRIPP) ծրագրի շրջանակներում, գործելու է մաքսային ծառայություն։ Այդ մասին Ազգային ժողովում ասել է Պետական եկամուտների կոմիտեի (ՊԵԿ) նախագահ Էդուարդ Հակոբյանը։
Նա չի հստակեցրել, թե արդյոք հայկական կո՞ղմն է մաքսային հսկողությունն անցկացնելու, միայն նշել է, որ կողմերն այժմ քննարկում են ծրագրի իրականացման մանրամասները:
««Թրամփի ուղու» հետ կապված ես ինքս վերջին հարցազրույցներից մեկում պարզաբանում տվել եմ, և նշվածը ենթադրում է մաքսային ծառայության առկայություն և, այո՛, վերահաստատում եմ, որ մաքսային ծառայությունն այդտեղ գործելու է»,- ասել է Հակոբյանը:
ՊԵԿ նախագահի խոսքով՝ անկախ դրանից՝ ՀՀ ընդհանուր մաքսային քաղաքականությունը տոտալ է՝ բոլոր սահմանների առևտրի դյուրացման ուղղությամբ բարեփոխումներ են արվում:
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP տրանսպորտային երթուղի:
