Մաեստրո Վալերի Գերգիևը տասնամյակներ անց կվերադառնա հայկական բեմ, հայտնում է Հայաստանի ազգային ֆիլհարմոնիկ նվագախումբը:
Հոկտեմբերի 2-ին նա ելույթ կունենա Երևանում՝ ֆիլհարմոնիկ նվագախմբի հետ:
Համերգը կկայանա Արամ Խաչատրյանի անվան դահլիճում և կսկսվի ժամը 19:30-ին: Գերգիևը 1981-1985թթ. ղեկավարել է Հայաստանի պետական սիմֆոնիկ նվագախումբը (ներկայիս՝ Հայաստանի ազգային ֆիլհարմոնիկ նվագախումբ - AT)։
Նշվում է, որ համերգը յուրահատուկ նշանակություն ունի, քանի որ ընդգծում է մաեստրոյի և ֆիլհարմոնիկի երկարամյա պատմական կապը։
Համերգը կկայանա Հայաստանի ազգային ֆիլհարմոնիկ նվագախմբի 100-ամյակի տոնակատարության շրջանակներում: Տոմսերի արժեքը 10-60 հազար դրամ է:
Գերգիևը մեր ժամանակների մեծագույն դիրիժորներից է, Իլյա Մուսինի աշակերտը և միջազգային մրցույթների դափնեկիր: 1988 թվականից ի վեր նա ղեկավարել է Մարիինյան թատրոնը՝ այն վերածելով ամենամեծ թատրոնի և համերգային համալիրի: Նա աշխատել է աշխարհի առաջատար նվագախմբերի հետ, ղեկավարել է Լոնդոնի և Մյունխենի ֆիլհարմոնիկ նվագախմբերը:
Նա միջազգային փառատոների կազմակերպիչ է և Չայկովսկու անվան մրցույթի ղեկավարը: Ռուսաստանի ժողովրդական արտիստ է, Աշխատանքի հերոս, Ռուսաստանի պետական մրցանակների և Հայաստանի, Գերմանիայի, Իտալիայի, Նիդեռլանդների, Լեհաստանի, Ֆրանսիայի և Ճապոնիայի բարձր պետական մրցանակների դափնեկիր:
