2025 թվականին մինչ այս պահը Հայաստանում Արևմտյան Նեղոս հիվանդության լաբորատոր հաստատված դեպքերը հասել են 2-ի, հայտնել են ՀՀ առողջապահության նախարարությունից։
Գերատեսչությունից, միևնույն ժամանակ, տեղեկացրել են եվրոպական առողջապահական մարմինների զգուշացման մասին։ Մասնավորապես, 2025 թվականի տաք ջերմաստիճանով պայմանավորված կարող է գրանցվել մոծակների միջոցով փոխանցվող հիվանդությունների աճ, իսկ ամենամեծ մտահոգությունն առաջացնում է Արևմտյան Նեղոսի տենդը:
Առողջապահական գերատեսչությունից հիշեցրել են, որ մոծակներով փոխանցվող հիվանդություններով վարակվելուց խուսափելու համար անհրաժեշտ է կրել փակ հագուստ անտառապուրակային գոտիներ և ջրային տարածքներ այցելելիս, օգտագործել միջատավանիչ հատուկ միջոցներ և սարքեր, հակամիջատային ցանցեր։
Հայաստանում հունիսի 3-ին արձանագրվել էր Արևմտյան Նեղոսի տենդ հիվանդության լաբորատոր հաստատված մեկ դեպք։ 2024-ի սեպտեմբերին Արևմտյան Նեղոսի վարակման դեպքերը Հայաստանում գերազանցել էին 130-ը։
