Փաստաբան Ռոման Երիցյանն Արցախի իշխանությունների անունից դատական հայց է ներկայացրել ընդդեմ ՀՀ տարածքային կառավարման և ենթակառուցվածքների նախարարության պետական գույքի կառավարման կոմիտեի՝ պահանջելով ներկայացուցչության շենքը նվիրաբերությամբ օտարել Արցախի Հանրապետությանը։
Փաստաբանն Armenia Today-ին մանրամասնել է, որ հայցը ներկայացվել է նվիրատվության վկայականի բացակայության պատճառով՝ շենքի նկատմամբ Արցախի սեփականության իրավունքը անվավեր ճանաչելու դատախազության պահանջին ի պատասխան։
Հայցով պահանջվում է պարտավորեցնել պատասխանողին կնքել նվիրատվության պայմանագիր հայցվորի հետ՝ Երևան քաղաքի Նաիրի Զարյան փողոցի թիվ 17/2 շենքն օտարելու վերաբերյալ։
Հայցում նշվում է, որ Հայաստանի կառավարության որոշմամբ շենքը 1997 թվականին փոխանցվել է Արցախին։
Երիցյանը նաև միջնորդություն է ներկայացրել՝ խնդրելով մինչև գործով վերջնական դատական ակտ կայացնելը պատասխանողին արգելել որևէ կերպ օտարել նշված գույքը ցանկացած երրորդ անձի, ինչպես նաև մինչ այդ խոչընդոտել հայցվորին օգտվել նշված գույքից։
Հուլիսի 15-ին ՀՀ գլխավոր դատախազությունը Կադաստրի կոմիտեի դեմ հայց էր ներկայացրել՝ պահանջելով անվավեր ճանաչել Երևանում Արցախի ներկայացուցչության շենքի նկատմամբ Լեռնային Ղարաբաղի Հանրապետության կառավարության սեփականության իրավունքի պետական գրանցումը։
